Արթուր Վանեցյանի հետ լինելու է այն, ինչ եղավ Գագիկ Ծառուկյանի հետ. վստահ եմ. Պատրաստ ենք դիմավորել ԱԱԾ-ին

Այս իշխանությունը հավաքելու է իր իրերն ու չքվի՝ ուզի՞ դա, թե՞ ոչ։ Նիկոլ Փաշինյանն այլ ճանապարհ չունի, ուզի թե չուզի՝ պետք է դիմի այդ քայլին, և որքան շուտ՝ այնքան լավ իր համար։ Այս մասին 168 TV-ի «Ռեվյու» հաղորդաշարի եթերում հայտարարել է «Հայրենիք» կուսակցության խորհրդի անդամ Արսեն Բաբայանը։

Իրավապաշտպանը պատմել է, որ 5 կուսակցությունով, այդ թվում «Հայրենիք» եւ «Բարգավաճ Հայաստան» կուսակցությունները համատեղ հայտարարություն են ընդունել ստեղծված իրավիճակի վերաբերյալ։

Ըստ Արսեն Բաբայանի՝ ՀՀ-ում առաջին անգամ արտախորհրդարանական ուժերն այսքան ուժեղ և այսքան միասնական են, ունեն մեկ հստակ պահանջ, ըստ որի՝ այս կառավարությունը պետք է հեռանա․

«Եթե մենք ուսումնասիրում ենք այս իշխանության պաշտոնավարման ընթացքում տարբեր ուժերի հայտարարություններն ու դրանց արձագանքները, ապա տեսնում ենք, որ որոշակի ժամանակ անց իշխանությունն այդ կոչերին հետևում է, այլ բան է, սակայն՝ ուշացումով։ Այնպես որ, ընդդիմադիր ուժերը հիմա կոչ են անում, որ այս կառավարությունը պետք է անհապաղ հեռանա։ Վստահ եմ՝ այս իշխանությունը վաղը ներողություն է խնդրելու ամբողջ պետական կառավարման համակարգի հերն անիծելու համար։ Այս իշխանությունը հավաքելու է իր իրերն ու չքվի՝ ուզի՞ դա, թե՞ ոչ։ Նիկոլ Փաշինյանն այլ ճանապարհ չունի, ուզի թե չուզի՝ պետք է դիմի այդ քայլին, և որքան շուտ՝ այնքան լավ իր համար եւ Հայաստանի համար։ Որովհետեւ բոլորս ենք տեսնում, թե ինչ է տեղի ունենում Հայաստանի կառավարման համակարգում»,- ասել է Արսեն Բաբայանը։

Նրա խոսքով՝ եթե կորոնավիրուսը համեմատում են պատերազմի հետ, ապա վատ իշխանությունը պատերազմի պայմաններում որակվում է՝ որպես վատ հրամանատարական կազմ, իսկ այդ պարագայում վատ հրամանատարական կազմը պարտավոր է լքել իր դիրքերը, կառավարումը, որովհետեւ իրական դավաճանն այն է, որ տեսնելով, որ չի կարողանում մարտ վարել, շարունակում է պաշտոնավարել։

Ինչ վերաբերում է կառավարության հրաժարականը պահանջող «Հայրենիք» կուսակցության ունեցած ռեսուրսներին՝ ապա, ըստ Բաբայանի, նոր կառավարության ձևավորման հարցը պետք է լուծվի քաղաքական ուժերի խորհրդակցությունների, միացման ճանապահով, ուստի որպես ռեսուրս՝ պետք է դիտարկել ժողովուրդն ու հանրությունը։

«Իսկ Արթուր Վանեցյանն ունի և հանրության, և ժողովրդի աջակցությունը, և դրա վկայությունն է մեր կուսակցության շարքերի աննախադեպ համալրումը»,- ասել է Արսեն Բաբայանը։

Ըստ նրա՝ Նիկոլ Փաշինյանի և գործող կառավարության այլընտրանքն ազգային համաձայնության կառավարությունն է, որը պետք է ստեղծվի քաղաքական, հասարակական, գիտական շրջանակների միասնական ուժերով, իսկ կառավարությունը պետք է լինի անցումային։

«Այս նոր ձևավորվող կառավարությունը պետք է պետությանը պատրաստի արտահերթ ընտրությունների՝ նախապես իրականացնելով «Կուսակցություների մասին», «Ընտրական օրենսգրքի» մասին, էլի մի քանի օրենքներում փոփոխություններ, որի նպատակը պետք է լինի քաղաքական ուժերի համար հավասար պայմաններ ստեղծելը։ Այս անցումային կառավարությունը պետք է կարողանա նաև երկիրը դուրս հանել այս արտակարգ իրավիճակից, իսկ դրա համար արդեն իսկ կա համախմբում. հայտնի քաղաքական ուժերը հավաքվել են մեկ քաղաքական օրակարգի շուրջ, ես չեմ ուզում առանձնացնել ոչ Արթուր Վանեցյանին, ոչ Գագիկ Ծառուկյանին, որովհետև այս համախմբման մեջ էական չէ անձը։ Չեմ էլ ուզում քննարկել, թե ով է լինելու հաջորդ վարչապետը, ազգային համաձայնության կառավարության ձևավորման ընթացքում այդ անձը տեսանելի կլինի, սակայն պետք չէ նախապես հենվել այդ անձի վրա»,- ասաց Արսեն Բաբայանը։

«Հայրենիք» կուսակցության խորհրդի անդամը մտավախություն չունի, որ Ազգային համաձայնության կառավարությանը հասնելու ճանապարհին իշխանությունն ինչ-որ պահի կարող է մեկուսացնել Արթուր Վանեցյանին։

«Արդեն 5-6 ամիս է՝ Նիկոլ Փաշինյանը տվել է հրահանգ՝ որևէ պատրվակով մեկուսացնել Արթուր Վանեցյանին։ ԱԱԾ նախկին տնօրենն ու ոստիկանապետը փոխվեցին, որովհետև նրանք կարողացել էին բացատրել Նիկոլ Փաշինյանին, որ չկա որևէ հիմք ԱԱԾ նախկին տնօրեն Արթուր Վանեցյանին մեկուսացնելու համար։ Այսօր տեսնում ենք մի 29-ամյա երիտասարդի, որը չունի սպայի փորձ, միանգամից նշանակվել է ԱԱԾ տնօրեն և իրականացնում է քաղաքական հետապնդում խորհրդարանական ամենամեծ ընդդիմադիր քաղաքական ուժի ղեկավարի նկատմամբ։ Ընդ որում ապօրինի։ Երբ Ծառուկյանը ելույթից հետո դուրս եկավ Ազգային ժողովի բակ՝ հարցաննության գնալու, մենք տեսանք, որ այնտեղ էր մի վեց մեքենա, հատուկ ջոկատայիններ, որ նրան տանեն ԱԱԾ։ Բայց երեկոյան պարոն Ծառուկյանը դուրս եկավ ԱԱԾ-ից եւ գնաց տուն, քանի որ չկարողացան նրան ձերբակալելու հարցը հենց այդ օրը լուծել։ Ես վստահ եմ, որ Արթուր Վանեցյանի հետ լինելու է այն, ինչ եղավ Գագիկ Ծառուկյանի հետ, բայց մենք պատրաստ ենք դիմավորել թե՛ ԱԱԾ-ի, թե այլ ուժային կառույցների ներկայացուցիչներին, պատրաստ ենք դիմավորել, բայց վերջում հաղթելու ենք հաստատ»,- ասել Արսեն Բաբայանը՝ նշելով, որ ունեն նաև սցենարներ այն դեպքերի համար, երբ կուսակցության ղեկավարը քաղաքական պայքարի ինչ-որ փուլում մեկուսացվի։

Ինչ վերաբերում է պարետի վերջին որոշումներին, մասնավորապես քաղաքացիների համար անձնագիրը մոտը պահելու պարտադիր պայմանին, Արսեն Բաբայանը պնդել է, որ պարետը, որի մասին սահմանադրությունում մեկ բառ չկա, վաղուց վերազանցել է իր լիազորությունները։ Ըստ Բաբայանի՝ այս որոշումը հերթական ապօրինությունն էր, ինչպես եւ ռեստորաններ փակելու որոշումները, որոնց համար այդ ռեստորանների տերերը կարող են դատ բացել ընդդեմ պարետի եւ շահել։

Համավարակի հետեւանքները հաղթահարելու կառավարության 18 ծրագրերը «Հայրենիք» կուսակցությունը վերլուծել է եւ շուտով դրա արդյունքները կներկայացնի հանրության դատին․

«Եվ մարդիկ կտեսնեն, թե ինչ անհեթեթ պատկեր է առաջացել այս կառավարության գործունեության արդյունքում։ Արտակարգ դրությունը պահում են հանրության ձայնը լռեցնելու համար։ Նույնիսկ Արտակաչգ դրության ռեժիմի պայմաններում հարյուրավոր մարդկանց են բերման ենթարկում։ ԱԴ դադարեցման պայմաններում դուք կտեսնեք, թե դժգոհության ինչ ալիք է բարձրանալու»։