Եթե համակարգում արձանագրվի, որ անձը հոգեկան առողջության հետ խնդիրներ ունի, նրա մեքենա վարելու իրավունքը կդադարեցվի

ՀՀ ԱԺ պաշտպանության և անվտանգության հարցերի մշտական հանձնաժողովը հավանություն տվեց ««Ճանապարհային երթևեկության անվտանգության մասին» օրենքում լրացումներ և փոփոխություններ կատարելու մասին» նախագծին: «Առաջին ընթերցմամբ ձեր ուշադրությանն եմ ներկայացնում ««Ճանապարհային երթևեկության անվտանգության մասին» օրենքում լրացումներ և փոփոխություններ կատարելու մասին» նախագիծը: Փոփոխությունները, ըստ էության, վերաբերում են վարորդական վկայականի՝ վարելու իրավունքի դադարեցման հոդվածին:

«Բովանդակությունը հետևյալն է. մենք ունենք մի շարք հիմքեր, որոնցով դադարեցվում է անձի մեքենա վարելու իրավունքը: Դրանք են՝ անգործունակ ճանաչվելը, իրավունքից զրկելու համար դատարանի կամ իրավասու մարմնի ուժի մեջ մտած ակտը, անձի մահվան դեպքը, և ունենք չորրորդ հիմքը, այն է՝ թմրամիջոցների կամ հոգեմետ հոգեներգործուն նյութերի օգտագործմամբ պայմանավորված հիվանդությունների վերաբերյալ առողջապահական մարմնի տված եզրակացությունը:

Մեր առաջարկությունը քննարկել և համաձայնեցրել ենք առողջապահության նախարարության գործընկերների հետ, և այն պահին, երբ «Արմեդ» համակարգում կարձանագրվի, որ անձը ունի թմրամիջոցների հետ կապված կամ հոգեկան առողջության հետ կապված այնպիսի սահմանափակումներ, որոնք պետք է հանգեցնեն վարելու իրավունքի դադարեցմանը, ինքնաշխատ եղանակով ՆԳՆ էլեկտրոնային ռեգիստրը տեղեկատվությունը կստանա առողջապահական համակարգից, և անձի մեքենա վարելու իրավունքը կդադարեցվի: Սա է ամբողջ գործընթացը»,- ասաց ՆԳ նախարարի տեղակալ Արմեն Ղազարյանը: