ԱԺ-ն առաջին ընթերցմամբ ընդունեց թմրամիջոցների շրջանառության պատժի խստացման, ոսկերչության ոլորտի հարկային բեռի թեթևացման և այլ նախագծեր

Ազգային ժողովի՝ ապրիլի 16-ի նիստին առաջին ու երկրորդ ընթերցմամբ և ամբողջությամբ ընդունվեցին մի շարք նախագծեր:

Առաջին ընթերցմամբ ընդունվեց թմրամիջոցների ապօրինի շրջանառության հետ կապված մի շարք հանցագործությունների պատժաչափերը խստացնելու նախագիծը: Ըստ այդմ՝ առաջարկվում է խստացնել պատիժը իրացնելու նպատակով թմրամիջոց արտադրելու, պատրաստելու, վերամշակելու, ձեռք բերելու, պահելու, տեղափոխելու, առաքելու, տարածելու, գովազդելու և իրացնելու դեպքում, եթե դա տեղի է ունենում ՏՏ-ի միջոցով, օրինակ՝ «Տելեգրամ» ալիքով, 3-6 տարվա փոխարեն նախատեսելով 4-8 տարվա պատիժ: Իսկ անչափահասին թմրամիջոց վաճառելու կամ վաճառքի մեջ անչափահասի ներգրավելու դեպքում առաջարկում է 3-6 տարի ազատազրկման փոխարեն նախատեսել 6-12 տարվա պատիժ:

ԱԺ «Հայաստան» խմբակցության պատգամավոր Արծվիկ Մինասյանը հայտարարեց, որ կողմ են քվեարկել նախագծին, բայց նաև հույս հայտնեց, որ առաջինից երկրորդ ընթերցում պատժաչափերը կվերանայվեն:

Առաջին ընթերցմամբ ընդունվեց նաև օտարերկրյա և տեղացի ներդրողներին հավասար իրավունքներ ու ազատություններ տալու նախագիծը, որը մայր օրենք է: Ըստ այդմ՝ նախագիծը բացառում է խտրականության երաշխիքը 2 հայտնի բաղադրիչներով՝ ազգային ռեժիմ, ըստ որի՝ օտարերկրյա ներդրողներն ունեն տեղացի ներդրողներին հավասար իրավունքներ, ազատություններ և պարտականություններ, և առավել բարենպաստության ռեժիմը, ըստ որի՝ ՀՀ-ում բոլոր օտարերկրյա ներդրողները համանման հանգամանքներում ունեն հավասար իրավունքներ, այսինքն՝ օտարերկրյա ներդրողն իրավունք ունի ակնկալել ՀՀ-ից այն նույն բարենպաստ վերաբերմունքը, որը ՀՀ-ում կիրառվում է որևէ այլ օտարերկրյա ներդրողի նկատմամբ:

ԱԺ «Հայաստան» խմբակցության պատգամավոր Արծվիկ Մինասյանը հայտարարեց, որ դեմ են քվեարկել այս նախագծին, քանի որ այն այս տարբերակով հակասում է ներդրումներ ներգրավելու քաղաքականությանը՝ հույս հայտնելով, որ առաջինից երկրորդ ընթերցում այն կփոփոխվի:

Առաջին ընթերցմամբ ընդունվեց նաև ոստիկանությունում կատարողականի գնահատման նոր համակարգ ներդնելու նախագիծը, որը ընդհանուր գնահատական կձևավորի յուրաքանչյուր տարվա կտրվածքով, և այն կլինի չափելի՝ թե՛ անհատական մակարդակում, թե՛ կառուցվածքային ստորաբաժանման մակարդակում գնահատելով ծառայության կողմից իրականացված աշխատանքը:

Առաջին ընթներցմամբ ընդունվեց նաև ոսկերչության ոլորտում հարկային բեռի թեթևացմանն ուղղված նախագիծը, ըստ որի՝ ոսկեգործության և ադամանդագործության համար նպաստավոր հարկային միջավայրի կձևավորվի: Առաջարկվում են ԱԱՀ-ով հարկման արտոնյալ կարգավորումներ:

Երկրորդ ընթերցմամբ և ամբողջությամբ ընդունվեց ««Տեսալսողական մեդիայի մասին» օրենքում փոփոխություններ և լրացումներ կատարելու մասին» օրենքի նախագիծ, ըստ որի՝ Հեռուստատեսության և ռադիոյի հանձնաժողովը հնարավորություն կունենա սանկցիա կիրառել ցանցային օպերատորների նկատմամբ այն պարագայում, եթե արձանագրվեն առերևույթ խախտումներ ՀՀ ներքաղաքական կյանքին միջամտելու տեսանկյունից: Վարույթ հարուցվելու պարագայում ցանցային օպերատորը պետք է տվյալ հաղորդումն այլևս չհեռարձակի մինչև այն պահը, երբ կայացված կլինի վերջնական որոշումը: Դա չիրականացնելու պարագայում պատասխանատվության ենթակա սուբյեկտ կհամարվի ցանցային օպերատորը: