Ազգային ժողովին բացատրեք, թե ուր է քաղաքապետը.(տեսանյութ)

Նախ Ազգային ժողովին բացատրեք, թե ուր է քաղաքապետը, ինչու չի ներկայացել այս քննարկմանը, նա եզակի և միակ պաշտոնյան է, ով արդեն երկրորդ անգամ է բյուջեի ԱԺ քննարկումներին բացակայում է: Այս մասին Տարածքային կառավարման և տեղական ինքնակառավարման, գյուղատնտեսության և բնապահպանության հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստին, դիմելով Երևանի փոխքաղաքապետ Հայկ Սարգսյանին, ով ներկայացնում էր 2019 թվականի բյուջեի կատարման հարցը, ասաց «Լուսավոր Հայաստան» խմբակցության պատգամավոր Մանե Թանդիլյանը:

«Եթե մեկուսացման խնդիր կա, ինչը մամուլից եմ իմանում, մենք հնարավորություն ունենք հեռավար կազմակերպելու, անհրաժեշտ է ժամանակին տեղյակ պահելու: Ես խնդրում եմ պարզաբանել՝ ինչ է կատարվում, և ինչու ԱԺ չի տեղեկացվում, որ չի ներկայանալու քաղաքապետը, ինչու եք հենց Դուք ներկայացնում, երբ կա առաջին տեղակալ՝ հատկապես լինելով այն պաշտոնյան, ով աշխատանքից ազատվելու խնդրանքով է դիմել, որից հետո անհասկանալի հանգամանքներով 1․8 միլիոն պարգևավճար է ստանում: Դուք ում եք ներկայացնում, կարող է մեկ ուրիշ փոխքաղաքապետ գալ և ասել՝ ես եմ ներկայացնելու Երևանի բյուջեն»-ասաց Մանե Թանդիլյանը:

Հայկ Սարգսյանը պարզաբանեց, որ քաղաքապետի բացակայության պատճառը երեկ մամուլում արդեն հարապարկվել է իրենց լրատվական ծառայության կողմից: «Խոսքը վերաբերում է նրան, որ քաղաքապետը կոնտակտավոր անձ է երկու աշխատակիցների հետ սերտ շփման արդյունքում»,-ասաց նա:

Ինչ վերաբերում է իր կողմից բյուջեն ներկայացնելուն, ապա նա ասաց, որ հավանաբար դա պայմանավորված է նրանով, որ երևի ֆինանսական զեկույց է և քաղաքապետը նպատակահարմար է գտել, որ ֆինանսական գծով տեղակալը ներկայացնի:

Մանե Թանդիլյանը արձագանքեց, որ կոնտակտավոր լինելը, վարակված լինելուց հաստատ վատ չէ և եթե վարչապետը կարողացել է վարակված լինելու պայմաններում հեռավար մասնակցել, դա կարող էին ապահովել, և Ազգային ժողովը այդ մասին չպետք է լրատվամիջոցներից իմանա: