«Ալոն» և «Մասիվցի Անդիկը» ձերբակալվել են

Այսպես կոչված «օրենքով գողեր» և «քրեական հեղինակություններ» համարվող երեք տասնյակ անձանց բնակարաններում խուզարկություններ կատարելու ժամանակ զենք և թմրամիջոցներ առգրավելուց հետո ոստիկանությունը ձերբակալել է նրանցից երկուսին:

Ոստիկանության ԶԼՄ-ների հետ կապի, լրատվության և վերլուծության բաժնի պետ Զարզանդ Գաբրիելյանն «Ազատության» հետ զրույցում նշեց, որ ձերբակալվածներին մեղադրանք դեռ չի առաջադրվել․ - «[Ձերբակալվել են] «Ալո» մականունով Ալեքսանդր Մակարյանը և «Մասիվցի Անդիկ» մականունով Անդրանիկ Հարությունյանը: Մյուսները որպես վկա հարցաքննվել են, ազատ են արձակվել»:

Երեկ ոստիկանությունը տեսանյութ տարածեց, ըստ որի հարուցված քրեական գործի շրջանակներում խուզարկություններ են կատարել «օրենքով գողեր»-ի բնակարաններում։

Իրավապահները հայտնաբերել են զենք-զինամթերք, թմրամիջոցներ: «Քրեական հեղինակությունները» բերման են ենթարկվել ոստիկանության տարածքային բաժիններ։ Նրանց բնակարաններից հայտնաբերված զենք-զինամթերքը, թմրամիջոցի նմանվող զանգվածներն ու այլ իրեր ուղարկվել են ոստիկանության փորձաքրեագիտական վարչություն», - նշված է ոստիկանության հաղորդագրության մեջ:

Ոստիկանությունից, սակայն չպարզաբանեցին, թե ինչու է մոտ 30 բերման ենթարկվածից միայն 2-ը ձերբակալվել:

Արդյոք նախկին իշխանությունների թողտվության մթնոլորտն էր պատճառը, որ ոստիկանությունն ավելի վաղ չէր զբաղվում քրեական հեղինակություն որակվող մարդկանց օրինականության դաշտ բերելով:

Ոստիկանապետ Վալերի Օսիպյանը հորդորեց այդ հարցով դիմել իր նախկին պաշտոնակիցներին․ - «Էդ ձեր ասած քրեական հեղինակությունները իրենք էլ են նույնպես մարդ, իրենք էլ են Հայաստանի Հանրապետության քաղաքացիներին, նույնպես իրավունքներ ունեն և պարտականություններ: Անկախ ամեն ինչից, ցանկացած ոք Հայաստանի Հանրապետությունում պետք է ենթարկվի օրենքին»:

Իրավապաշտպան Արթուր Սաքունցը համոզված է, որ նոր իշխանությունը Հայաստանում իր առջև իրավական պետություն կառուցելու խնդիր է դրել․ - «Հստակ քայլեր է կատարում՝ ելնելով այն սկզբունքից, որ կրիմինալը, քրեական աշխարհը և քրեական կանոնները չեն կարող համատեղվել իշխանության հետ»: