Հայ-վրացական սահմանին մրգի ու բանջարեղենի դատարկ տարաների մաքսազերծումը բխում է ԵԱՏՄ մաքսային օրենսգրքից

Tert.am-ն արդեն տեղեկացրել էր, որ ջավախահայերից ահազանգ էր ստացել, որ hայ-վրացական սահմանին հայկական կողմը պահանջում է մաքսազերծել նաև արտահանման ենթակա մրգի ու բանջարեղենի դատարկ տարաները:

ՊԵԿ տեղեկատվության և հասարակայնության հետ կապերի բաժնից Tert.am-ին տեղեկացրին, որ մաքսապետի նման գործելաոճը բխում է ԵԱՏՄ մաքսային օրենսգրքի տրամաբանությունից: Ըստ ՊԵԿ պատասխանի՝ ԵԱՏՄ մաքսային օրենսգրքի 14-րդ հոդվածի 1-ին մասի «Միության մաքսային տարածք ներմուծվող ապրանքները Միության մաքսային սահմանը հատելու պահից գտնվում են մաքսային հսկողության տակ»:

Պատասխանի մեջ, մասնավորապես ասված է. «Համաձայն ԵԱՏՄ մաքսային օրենսգրքի 104-րդ հոդվածի 1-ին մասի՝ «Ապրանքները ենթակա են մաքսային հայտարարագրման դրանք մաքսային ընթացակարգով ձևակերպելու դեպքում կամ սույն Օրենսգրքի 258-րդ հոդվածի 4-րդ կետով, 272-րդ հոդվածի 4-րդ կետով և 281-րդ հոդվածի 2-րդ կետով նախատեսված դեպքերում», իսկ 127 րդ հոդվածի 1-ին մասի համաձայն՝ «Միության մաքսային սահմանով տեղափոխվող ապրանքները և այլ ապրանքներ սույն Օրենսգրքով սահմանված դեպքերում Միության մաքսային տարածքում գտնվելու և օգտագործվելու, Միության մաքսային տարածքից արտահանվելու և (կամ) Միության մաքսային տարածքից դուրս գտնվելու և օգտագործվելու համար ենթակա են մաքսային ընթացակարգերով ձևակերպման, եթե սույն Օրենսգրքով այլ բան սահմանված չէ»:

 ՄՕ 105-րդ հոդվածի համաձայն Մաքսային հայտարարագրման ժամանակ կիրառվում են մաքսային հայտարարագրի 4 տեսակներ, որոնք են. 1.ապրանքների հայտարարագիր, 2. տարանցման հայտարարագիր, 3. ուղևորային մաքսային հայտարարագիր, 4. տրանսպորտային միջոցի հայտարարագիր:

ԵԱՏՄ ՄՕ 88-րդ հոդվածի 5-րդ մասի համաձայն՝ «Փոխադրողը կամ սույն Օրենսգրքի 83-րդ հոդվածում նշված այլ անձինք մաքսային մարմնի աշխատանքային ժամերին՝ ժամանման մասին ծանուցման պահից սկսած 3 ժամվա ընթացքում, եթե անդամ պետությունների՝ մաքսային կարգավորման վերաբերյալ օրենսդրությամբ այլ ժամկետ չի սահմանվել նավով, օդանավով կամ երկաթուղային տրանսպորտով փոխադրվող ապրանքների համար կամ միջազգային փոստային առաքանիների համար, պարտավոր են կատարել մաքսային գործառնություններից որևէ մեկը, որը կապված է՝ 1. ապրանքները ժամանակավոր պահպանման հանձնելու հետ, 2. անդամ պետությունների՝ մաքսային կարգավորման վերաբերյալ օրենսդրությամբ սահմանված կարգով ժամանման վայրերից ժամանակավոր պահպանման վայրեր ապրանքների փոխադրման հետ, 3. ապրանքների մաքսային հայտարարագրման հետ, 4. նավահանգստային ԱՏԳ կամ լոգիստիկ ԱՏԳ տարածքում «ազատ մաքսային գոտի» մաքսային ընթացակարգով ապրանքների ձևակերպման հետ, 5. Միության մաքսային տարածքից ապրանքների արտահանման հետ»:

ԵԱՏՄ մաքսային օրենսգիրքը նախատեսում է թվով 17 մաքսային ընթացակարգ՝ 1. ներքին սպառման համար բացթողում, 2. Արտահանում, 3. մաքսային տարանցում, 4.մաքսային պահեստ, 5. մաքսային տարածքում վերամշակում, 6. մաքսային տարածքից դուրս վերամշակում, 7. ներքին սպառման համար վերամշակում, 8. ազատ մաքսային գոտի, 9. ազատ պահեստ, 10. ժամանակավոր ներմուծում, 11. ժամանակավոր արտահանում, 12. վերաներմուծում, 13. վերաարտահանում, 14. անմաքս առևտուր, 15. ոչնչացում, 16. հրաժարում՝ հօգուտ պետության, 17. հատուկ մաքսային ընթացակարգ:

ՊԵԿ-ը վստահեցնում է, որ վերոգրյալ դրույթներից բխում է, որ մաքսային սահմանով փոխադրվող ապրանքները տեղափոխող կամ փոխադրող անձինք պարտավոր են այս կամ այն եղանակով իրականացնել մաքսային օրենսդրությամբ սահմանված մաքսային գործառնություններ, կապված այդ ապրանքների հայտարարագրման, ընթացակարգերի տակ դնելու հետ:

Հիշեցնենք, որ վրացահայ գործարարները պնդում են, թե այս կարգավորումները վնասում են ՀՀ-ից դեպի Վրաստանի միրգ ու բանջարեղեն արտահանելուն, և հույս էին հայտնել, որ խնդրին որևէ լուծում կտրվի: