2017թ. ԱԺ-ն տնտեսման արդյունքում բյուջե է վերադարձրել 44 մլն դրամ

Հաշվետու տարում Ազգային ժողովը տնտեսման արդյունքում բյուջե է վերադարձրել 44 մլն դրամ. ԱԺ-ում 2017թ.-ի բյուջեի կատարողականի քննարկմանը տեղեկացրեց ՀՀ ԱԺ աշխատակազմի ղեկավար Արա Սաղաթելյանը:

Նրա տեղեկացմամբ՝ վերանայվել է ԱԺ ավտոտրանսպորտային տնտեսությունը, որի արդյունքում նախորդ տարի 81 մեքենայից 14-ը կրճատվել է, 7-ը նախատեսվում է կրճատել այս տարի։

Արա Սաղաթելյանը նշեց, որ 2017թ.-ին ԱԺ-ին հատկացվել է 4 մլրդ 399 մլն 493 հազար դրամ՝ 4 ծախսային ծրագրի գծով:

 Ըստ նրա՝ ներգրավվել են նաև միջոցներ ՀՀ նախագահի աշխատակազմից՝ 53 մլն դրամի չափով։

«Արդյունքում ԱԺ ճշտված բյուջեն 8 ծրագրերի գծով կազմել է 4 մլրդ 452 մլն 493 հազար դրամ։ Բյուջեն ծախսվել է 99 տոկոսի չափով», - ասաց նա։

«ԱԺ աշխատակազմի և պատգամավորների պահպանում» ծրագրով ծախսվել է 4 մլրդ 139 մլն 712 հազար դրամ։

Նրա խոսքով՝ ԱԺ աշխատակազմի փաստացի ծախսերը 2016թ.-ի համեմատ 350 մլն դրամով պակասել են, ինչը տեղի է ունեցել 26 պատգամավորի, 26 օգնականի և աշխատակազմից 26 աշխատակցի կրճատման արդյունքում։

37 մլն դրամ ծախսվել է ԱԺ մասնաշենքում գտնվող ՊՊԾ զորանոցի և ԱԺ շենքի ջեռուցման համակարգի մասնակի վերանորոգման համար, 14 մլն դրամ էլ՝ զորանոցի գույքի ձեռքբերման համար։