Էմիլ Բաբայանը չընտրվեց Սահմանադրական դատարանի դատավոր

Ձայների 51 կողմ, 3 դեմ հարաբերակցությամբ Էմիլ Բաբայանը չընտրվեց Սահմանադրական դատարանի դատավոր։

«Սահմանադրական դատարանի դատավորի ընտրության համար առաջադրվել է Էմիլ Բաբայանի թեկնածությունը։ Նրա ազգանունն ընդգրկվել է գաղտնի քվեարկության քվեաթերթիկում։ Հայաստանի Ազգային ժողովի 105 պատգամավորներից քվեարկությանը մասնակցել են 54-ը։ Բացելով գաղտնի քվեարկության քվեատուփը՝ հաշվիչ հանձնախումբը պարզեց՝ քվեատուփում առկա էր 54 քվեաթերթիկ, որոնցից անվավեր որևէ մեկը չի ճանաչվել։ Ձայները բաշխվել են հետևյալ կերպ՝ կողմ 51, դեմ 3։ Այսպիսով՝ Հայաստանի Հանրապետության Սահմանադրական դատարանի դատավոր չի ընտրվում», - հայտարարեց Ժամանակավոր հաշվիչ հանձնաժողովի նախագահ Գագիկ Մելիքյանը։

Լեռնային Ղարաբաղի նախագահի խորհրդական Էմիլ Բաբայանի թեկնածությունն առաջդրել էր նախագահ Արմեն Սարգսյանը։ Նրան խորհրդարանում ներկայացնում էր ՀՀԿ խմբակցության պատգամավոր, Եվրոպական դատարանում Հայաստանի ներկայացուցիչ Գևորգ Կոստանյանը։

Ավելի քան երեք տասնյակ հասարակական կազմակերպություններ դիմել էին Ազգային ժողովի նախագահ Արա Բաբլոյանին՝ խնդրելով չընտրել Սահմանադրական դատարանի դատավորի թափուր տեղի համար նախագահ Արմեն Սարգսյանի առաջադրած թեկնածուին:

Նաև իրավապաշտպան գործունեությամբ զբաղվող կազմակերպություններն էին պնդում, որ նախագահ Սարգսյանը պետք է առաջին հերթին մրցույթ անցկացներ և հնարավորություն տար բարձրակարգ իրավաբաններին մասնակցություն ունենալ դրանում։ Հակառակ դեպքում, ինչպես իրենց հայտարարությունում պնդում են նրանք, այսպիսի նշանակումները և ընտրությունները հովանավորչության և ոչ թափանցիկ և հակաժողովրդավարակաան ավանդույթների առկայության հիմնավոր կասկածներ են հարուցում։

Նշենք, որ ՍԴ անդամի թափուր տեղ էր առաջացել, երբ լրացել էր ՍԴ նախկին նախագահ Գագիկ Հարությունյանի պաշտոնավարման ժամկետը: Գագիկ Հարությունյանն այժմ գլխավորում է Բարձրագույն դատական խորհուրդը: ՍԴ ներկայիս նախագահ Հրայր Թովմասյանը դատարանում փոխարինել էր Կիմ Բալայանին: