Երեք պատգամավորներ ներկա չեն ԱԺ հատուկ նիստին

Վարչապետի ընտրության հարցով Ազգային ժողովի այսօրվա հատուկ նիստին գրանցվել է 102 պատգամավոր։ Երեք պատգամավոր բացակա է։

Ազգային ժողովի նիստերի ապահովման բաժնից «Ազատության»-ը տեղեկացրեցին, որ նիստից բացակայում են «Ծառուկյան» խմբակցության պատգամավորներ Իշխան Զաքարյանը, Մելիք Մանուկյանը և Հանրապետական խմբակցությունից Գրիգոր Ավալյանը։

Ըստ Ազգային ժողովի նիստերի ապահովման բաժնի ներկայացուցչի, երեք պատգամավորներից ոչ մեկը քվեարկության ծրարներ չեն թողել։

«Ծառուկյան» խմբակցության պատգամավոր Նաիրա Զոհրաբյանն «Ազատության»-ը փոխանցեց, որ Մելիք Մանուկյանը Հայաստանից բացակայում է առողջական խնդիրների պատճառով։ Ինքն անձամբ երեկ փորձել է տեղեկանք պատրաստել, որ Մելիքյանը կողմ է Փաշինյանի թեկնածությանը, սակայն իրեն Ազգային ժողովի աշխատակազմից տեղեկացրել են, որ փաստաթուղթը վավեր է համարվում միայն այն դեպքում, երբ պատգամավորը գտնվում է գործուղման մեջ։

«Իշխան Զաքարյանից ես անձամբ տեղեկություն չունեմ», - ասաց Զոհրաբյանը։

Նշենք, որ ըստ Ազգային ժողովի կանոնակարգ օրենքի 60-րդ հոդվածի 5-րդ կետի, Ազգային ժողովի կողմից գործուղման մեկնող պատգամավորը կարող է հարցի քվեարկության վերաբերյալ իր որոշման մասին գրավոր տեղեկացնել Ազգային ժողովի նախագահին: Պատգամավորի ստորագրած գրությունը փակ ծրարով աշխատակազմ պետք է հանձնվի նախապես՝ մինչև գործուղման մեկնելը: Ծրարի վրա և գրությունում նշվում է հարցի անվանումը, իսկ գրությունում՝ հարցին կողմ, դեմ կամ ձեռնպահ, ինչպես նաև ընտրվող պաշտոնում թեկնածուին կողմ կամ դեմ քվեարկելու մասին պատգամավորի որոշումը:

Քվեարկությունից հետո գրությունը կցվում է նիստի արձանագրությանը:

Նշենք, որ կանոնակարգում նշված չէ բացակայության այլ պատճառ։