Հասարակությունը պետք է թելադրի, եւ ոչ հասարակությանը

Այս օրերին քաղաքական դաշտում հետաքրքիր զարգացումներ են տեղի ունենում: Բոլորն անհամբեր սպասում են իրավիճակի հանգուցալուծմանը, բայց, ի վերջո, ե՞րբ կավարտի եւ ո՞ւր կտանի թավշյա հեղափոխությունը: Այս ամենը կախված է մեզնից յուրաքանչյուրից:

Այսօր, Նիկոլ Փաշինյանն ունի հասարակության մի զգալի մասի աջակցությունը, եւ բնականաբար, փորձում է րոպե առաջ իրացնել իր առավելությունը, հասկանալով, որ ժամանակն իր օգտին երկար չի կարող աշխատել: Սա նորմալ է, քանի որ հեղափոխությունները ունենում են իրենց վերելքը, պիկը եւ նվազման ընթացքը:

Հաշվի առնելով այն հանգամանքը, որ պատանիներին ու երիտասարդներն առավել ազատամիտ ու հուզական են եւ բուռն են արձագանքում ստեղծված իրավիճակին, Նիկոլ Փաշինյանը քաջ գիտակցելով այդ նրբությունը, հենցում է հենց այդ սերնդի վրա: Իհարկե, այստեղ նրան օգնության ձեռք են մեկնում Շարմազանովը, Կոստանյանն իրենց ցինիկ եւ իրավիճակից կտրված հայտարարություններով: 

Այս ամենի արդյունքում ստվերում է մնում մեծամասնությունը, որը բանականության, ողջախոհության հաղթանակի կողմնակիցն է, որը հոգնել է ՀՀԿ-ից, բայց եւ չի ցանկանում ՀՀԿ-ն փոխարինել մի նոր ՀՀԿ-ով:

Հիմա ամենագլխավորն այն է, որ մեծամասնությանը չզրկեն իշխանության ձեւավորման իրավունքից: Հավատացեք, այսօր ՀՀ քաղաքացիների մեծամասնությունը, որը գուցե քիչ ակտիվ չէ, բայց նույնքան սիրում է իր երկիրը, որքան հրապարակում գտնվողները, իրավիճակի հանգուցալուծման ուղին տեսնում է բացառապես ՀՀ սահմանադրության եւ օրենքների շրջանակում: Ճանապարհը սա է: 

Արման Կարապետյան