«Դա շատ գեղեցիկ և գրագետ խաղ է». ինչի մասին է վկայում Պուտինի այցն Անկարա. «Газета»-ի անդրադարձը

ՌԴ նախագահ Վլադիմիր Պուտինը եռօրյա այցով ժամանել է Անկարա և բանակցություններ վարել Թուրքիայի նախագահ Ռեջեփ Թայիփ Էրդողանի հետ: Ապրիլի 4-ին նախատեսված է Իրանի նախագահ Հասան Ռոհանիի հետ Թուրքիայի և Ռուսաստանի առաջնորդների եռակողմ հանդիպումը, գրում է gazeta.ru-ն՝ վերլուծելով Պուտինի այցը։

Այցի առաջին օրը Վլադիմիր Պուտինը մասնակցել է «Աքքույու» ատոմային էլեկտրակայանի հիմնարկեքի առնչությամբ տեսակոնֆերանսին, որը, ինչպես նշել է ՌԴ նախագահը, կգործարկվի 2023 թվականին: Նախագծի իրականացման շրջանակում նախատեսվում է ընդհանուր առմամբ չորս էներգաբլոկի կառուցում, որոնք համալրված են լինելու «3+» սերնդի ՋՋԷՌ-1200 ռուսական ռեակտորներով: Պուտինը վստահեցրել է, որ ԱԷԿ-ի կառուցման համար կօգտագործվեն լավագույն ռուսական տեխնոլոգիաները:

Ինչպես նշում է լրատվամիջոցը, Եվրախորհրդարանը Թուրքիային համոզում էր հրաժարվել այդ ատոմային էլեկտրակայանի կառուցումից՝ կոչ անելով Անկարային միանալ Շրջակա միջավայրի վրա ազդեցության գնահատականի մասին հռչակագրին, որը պահանջում է հարևան պետությունների հետ խորհրդակցությունների անցկացում:

Թուրքիայի դեպքում անհրաժեշտ կլիներ մասնավորապես Հունաստանի և Կիպրոսի համաձայնությունը:

Թուրքիայի առաջնորդի հետ զրույցից հետո ՌԴ նախագահը հայտնել է, որ քննարկվել է նաև ռուս նախկին լրտես Սերգեյ Սկրիպալի թունավորման գործը և հայտնել Ռուսաստանի դիրքորոշումը: Նա նաև հայտնել է, որ նրանք Էրդողանի հետ պայմանավորվել են արագացնել Թուրքիային C-400 զենիթահրթիռային համալիրների մատակարարման ժամկետները:

Պուտինի այցն Անկարա դարձել է նախագահի պաշտոնում վերընտրվելուց հետո նրա առաջին օտարերկրյա այցը: Հարկավոր է նաև նշել, որ Թուրքիան ՆԱՏՕ-ի անդամներից միակ երկիրն է, որն ամբողջությամբ հրաժարվել է Ռուսաստանի դեմ «Սկրիպալի գործով» միջոցներ ձեռնարկելուց:

Լրատվամիջոցը նշում է, որ փորձագետներն այնքան էլ լավատեսորեն չեն գնահատում Թուրքիա Վլադիմիր Պուտինի այցը, որը վկայում է կարծես Անկարայի հետ հարաբերություններն ավելի ակտիվ զարգացնելու Մոսկվայի ցանկության մասին: Փորձագետների կարծիքով՝ թուրքական կողմի հետ շփումների ակտիվացումը պայմանավորված է Ռուսաստանի համար բարդ միջազգային իրադրությամբ:

Հաշվի առնելով արևմտյան երկրների կողմից դիվանագետների արտաքսման հետ կապված իրավիճակը՝ Թուրքիան մնում է Ռուսաստանի քիչ գործընկերներից մեկը, և Ռուսաստանին այնքան էլ շատ տարբերակներ չի մնում:

Փորձագետ Յուրի Մավաշևի խոսքով՝ այժմ թուրքական կողմը շատ թանկ է «վաճառելու» Ռուսաստանին իր համագործակցությունը և պարտադրելու է Մոսկվային մեծ զիջումների գնալ՝ «այդ թվում նաև այն ոլորտներում, որոնցում մենք երբեք դրանց չէինք համաձայնի, օրինակ՝ Անդրկովկասում»:

Փորձագետն ընդգծում է, որ Անկարան հետապնդում է նույն նպատակը՝ հայտարարելով «Սկրիպալի գործով» Արևմուտքի դիրքորոշումը չկիսելու իր ցանկության մասին:

«Դա շատ գեղեցիկ և գրագետ խաղ է: Արտաքնապես նրանք ցույց են տալու, որ ամեն ինչ լավ է, բայց փակ դռների հետևում նրանք այժմ իրենց պայմաններն են դնելու»,- ասել է նա: