Աշխարհի քաղաքների բնակչության աճի արագության օնլայն քարտեզ. Երեւանի բնակիչների թիվը կրճատվել է

Datawrapper ծառայության մասնագետները խոշոր քաղաքների բնակչության քանակի տատանումների օնլայն քարտեզ են մշակել: Այն կազմվել է 2000-ից մինչեւ 2016-ը թվականը ՄԱԿ-ի հավաքած տվյալների հիման վրա: Քարտեզի վրա 500 քաղաք է հայտնվել, որոնց բնակչությունը 2016-ին գերազանցել է մեկ միլիոնը, գրում է Naked-Science-ը:

Քարտեզի հեղինակները օգտվել են ՄԱԿ-ի The World’s Cities in 2016 զեկույցի տվյալներից: ՄԱԿ-ի տվյալներով՝ 2016 թվականին աշխարհի բնակչության 54.5 տոկոսն ապրել է քաղաքներում: Հետազոտողների կանխատեսումների համաձայն՝ 2030 թվականին քաղաքաբնակներ կդառնան մինչեւ 60 տոկոսը, իսկ մարդկանց մոտ մեկ երրորդը կտեղափոխվի մեկ միլիոն բնակչություն ունեցող քաղաքներ:

Քարտեզի հեղինակները երկու ցուցանիշներից կախված՝ տարբեր գույնի եւ չափի շրջաններով են նշել քաղաքները: Շրջանի չափը կապված է բնակչության քանակի հետ, գույնը ցույց է տալիս բնակիչների աճը եւ արտահոսքը: «Աճող» քաղաքները երկնագույնով են նշված (որքան մուգ է գույնը, այնքան արագ է աճում բնակչության թիվը): Նարնջագույնը վկայում է բնակչության թվի կրճատման մասին: Երեւանը նարնջագույնով է պատկերված: Ըստ ծառայության տվյալների՝ 2000-ին Երեւանի բնակչությունը 1.1 մլն է եղել, իսկ 2016-ին՝ 1 մլն: Այսպիսով ամեն տարի արտահոսքը կազմել է -0.4 տոկոս:

Թբիլիսին եւ Բաքուն երկնագույնով են նշված:

Այսպիսով, Թբիլիսիի բնակչությունը 2000 թվականին կազմել է 1.1 մլն, 2016-ին՝ 1.1 մլն: Բնակչության ներհոսքը գնահատվում է տարեկան 0.3 տոկոս: Բաքվի բնակչությունը 2000 թվականին եղել է 1,8 մլն, իսկ 2016 թվականին` 2,4 մլն մարդ, աճը կազմել է 1,9 տոկոս: