ՄԻԵԴ վճռով Հայաստանը 12 200 եվրո կփոխհատուցի ՀՀ քաղաքացուն

Մարդու իրավունքների եվրոպական դատարանն ընդդեմ Հայաստանի հերթական վճիռն է կայացրել: Հայաստանը 1957 թվականին ծնված, Երևանի բնակիչ Վարդան Թեյմուրազյանին կփոխհատուցի 11,700 եվրո՝ որպես ոչ նյութական վնասի փոխհատուցում, և 500 եվրո` որպես ծախքերի հատուցում:

Tert.am-ը ՄԻԵԴ-ի վճռից տեղեկացավ, որ դիմումատուն՝ Վարդան Թեյմուրազյանը, բողոք է ներկայացրել նյութական փոխհատուցման պահանջով, որովհետև ՀՀ-ում վնասի փոխհատուցում չի ապահովվել նրա հանդեպ վատ վերաբերմունքի և անօրինական կալանավորման համար։

2005-ին Թեյմուրազյանի նկատմամբ քրեական գործ է հարուցվել՝ Ճանապարհային ոստիկանության երկու աշխատակիցների վրա հարձակում գործելու մեղադրանքով: Թեյմուրազյանի նկատմամբ խափանման միջոց է ընտրվել կալանավորումը, և դիմումատուն կալանքի տակ է մնացել մոտ 2 ամիս:

Այնուհետև՝ 2006-ին, Թեյմուրազյանն արդարացվել է, որովհետև դատարանում պարզվել է, որ ոստիկանության աշխատակիցներն են բռնություն գործադրել Թեյմուրազյանի նկատմամբ:

Դիմումատուն հայց է ներկայացրել, սակայն ոստիկանության աշխատակիցները պատասխանատվության չեն ենթարկվել, որովհետև Վերաքննիչ դատարանը նշել է, որ հնարավոր չէ վերսկսել դատավարությունը, եթե դատախազությունը նախապես որոշել է մեղադրանք չառաջադրել ոստիկանության ծառայողներին:

2018 թվականի մարտի 15-ին Եվրոպական դատարանը հրապարակել է «Թեյմուրազյանն ընդդեմ Հայաստանի» գործով վճիռը, որով արձանագրել է Մարդու իրավունքների եվրոպական կոնվենցիայի 13-րդ հոդվածի՝ ներպետական իշխանության առջև արդյունավետ միջոցների իրավունք, և 5-րդ հոդվածի 5-րդ կետի՝ փոխհատուցման իրավունք, խախտում:

Դիմումատուն պնդել է, որ Հայաստանի Հանրապետության օրենսդրությունը խոշտանգման և ոչ իրավաչափ կերպով ազատությունից զրկելու դեպքում ոչ նյութական վնասի փոխհատուցման հնարավորություն չի նախատեսում:

Եվրոպական դատարանը գտել է, որ Հայաստանի իշխանությունները չեն ապահովել դիմումատուի՝ ներպետական իշխանությունների առջև արդյունավետ միջոցների և փոխհատուցում ստանալու իրավունքը:

Եվրոպական դատարանը Հայաստանի Հանրապետությանը պարտավորեցրել է դիմումատուին վճարել 11,700 եվրո` որպես ոչ նյութական վնասի փոխհատուցում, և 500 եվրո` որպես ծախսերի հատուցում: