Ողջ հայ ժողովուրդը պետք է աշխատի ի բարօրություն բանակի եւ նրա հեղինակության. Հրանուշ Հակոբյան

Ըստ էության, ես չեմ լսում այն, ինչ ասում են։ Ես ինձ զբաղեցրել եմ նրանով, որ տարիներով կուտակած փորձս եւ պրոֆեսիոնալ ճանապարհս չկորչեն, այլ հանձնվեն թղթին։ Այս մասին Երեւանում Անկախության հռչակագրի ընդունման 32-րդ տարեդարձին նվիրված Հայաստանի Գերագույն խորհրդի խորհրդանշական «նիստում» օգոստոսի 23-ին ասել է սփյուռքի նախկին նախարար Հրանուշ Հակոբյանը՝ մեկնաբանելով Նիկոլ Փաշինյանի առավոտվա ուղերձը, որում մեջբերում էր կատարվել Աստվածաշնչից։

Նրա կարծիքով՝ հայ ժողովուրդն այսուհետ որեւէ բան կորցնելու իրավունք չունի։ Նա պետք է ստեղծելու, կառուցելու, պաշտպանվելու եւ ուժեղ բանակ ունենալու հնարավորություն ունենա։ «Մեր բանակի ուժը կենտրոնացած է մեր ձեռքերում։ Մենք պետք է պաշտպանված սահմաններ ունենանք։ Ողջ հայ ժողովուրդը պետք է աշխատի ի բարօրություն բանակի, նրա գեներալների, սպաների եւ զինվորների հեղինակության։ Մենք պետք է նրան ուժ տանք։ Մենք պարտք ունենք ընկած տղաների առջեւ։ Մենք պետք է գլուխներս խոնարհենք նրանց հիշատակի առջեւ, քանի որ եթե նրանք չլինեին, մենք կարող էինք արդեն չլինել»,- ասել է Հակոբյանը։

Նա նաեւ տեղեկացրել է, որ փորձում է հեռու մնալ քաղաքական դիսկուրսից՝ ուշադրություն հատկացնելով միայն օրենսդրությանը, քանի որ դասավանդում է համալսարանի ուսանողներին։ «Շատ բաներ ես ընկալել եմ շատ ցավագին։ Այս առնչությամբ առողջական խնդիրներ եմ ունեցել։ Հիմա փորձում եմ ավելի շատ կենտրոնանալ գիտական եւ ստեղծագործական գործունեության վրա»,- ամփոփել է նախկին նախարարը։

Հիշեցնենք, որ Հայաստանի վարչապետ Նիկոլ Փաշինյանը Անկախության հռչակագրի 32-րդ տարեդարձի առիթով արված ուղերձում ներկայացրել է երկրի անկախության իր տեսլականը ՝ զուգահեռ անցկացնելով աստվածաշնչյան առակի հետ։ Անկախությունը նրա համար, առաջին հերթին, անվտանգությունն է եւ հարեւանների հետ կարգավորված հարաբերությունները։ Նրա խոսքով՝ անկախությունը նման է աստվածաշնչյան «տասը մնասի» առակին. «Ով ունի, նրան կտրվի, իսկ ով չունի, նրանից նույնիսկ իր ունեցածը կվերցվի»։ Կառավարության ղեկավարը անկախությունը համեմատել է նաեւ առողջության հետ. «Անգամ այն ունենալով՝ պետք է ամեն օր հոգ տանել նրա մասին»,- ասել է Նիկոլ Փաշինյանը։