Չենք բացառում, որ Ադրբեջանը կփորձի բանակցությունները փակուղի մտցնել. Փաշինյան

Խաղաղության օրակարգն այլընտրանք չունի Հայաստանի համար: Այս մասին, այսօր՝ ապրիլի 13-ին, ԱԺ-ում կառավարության 2021 թվականի ծրագրի կատարողականի քննարկման ժամանակ հայտարարեց ՀՀ վարչապետ Նիկոլ Փաշինյանը:

Նա ասաց, թե, քանի որ Ավագ շաբաթ է, խոստովանում է՝ անսահման մեղավորություն է զգում Աստծո առաջ, որ չկարողացավ կյանքի կոչել նրա մեծագույն պատվիրաններից մեկը. «Երանի խաղաղարարներին, որովհետև Աստծո որդիներ պիտի կոչվեն»: Բայց, քավ լիցի, եկեք տուրք չտանք էմոցիաներին, որովհետև հիմա մեզ, առավել քան երբևէ, պետք է սթափ դատողություն ու իրատեսական գնահատական», - ասաց նա:

Փաշինյանն անդրադարձավ ապրիլի 6-ին Բրյուսելում տեղի ունեցած եռակողմ հանդիպմանը՝ նշելով, որ այդ հանդիպման արդյունքներով՝ ինքը համաձայնություն է տվել, որ Հայաստանի ու Ադրբեջանի ԱԳ նախարարները սկսեն խաղաղության պայմանագրի նախապատրաստական աշխատանքները:

«Ադրբեջանի հետ խաղաղության պայմանագրի ստորագրումը որքան հնարավոր է արագ, այո, մտնում է մեր պլանների մեջ, բայց պիտի ասեմ, որ այստեղ էլ իլուզիաներ չունենք, որովհետև չենք բացառում, որ Ադրբեջանը կփորձի խաղաղության բանակցությունների գործընթացը հնարավորինս արագ փակուղի մտցնել՝ դա դարձնելով Հայաստանի եւ Արցախի դեմ նոր ագրեսիվ գործողությունների առիթ:

Նույն հաշվարկը ունենք նաև դելիմիտացիայի աշխատանքների կապակցությամբ, որովհետև չենք բացառում, որ Ադրբեջանը այդ գործընթացը օգտագործի Հայաստանի նկատմամբ տարածքային պահանջներ ձևակերպելու համար՝ դե յուրե հայտարարելով, որ ոչ մի տարածքային պահանջ էլ չունի», - ասաց նա:

Փաշինյանն ընդգծեց, որ հասկանալով ու հաշվարկելով բոլոր ռիսկերն ու մարտահրավերները՝ Հայաստանը եկել է այն եզրակացության, որ նույն կետում կանգնելն ու գործընթացում որոշակի առաջընթաց չապահովելը ոչ միայն չի նվազեցնում, այլև ավելի է սրում ռիսկերը:

«Այս է պատճառը, որ մենք նաև դելիմիտացիայի հարցում ենք Բրյուսելում եկել համաձայնության՝ մինչև ապրիլի վերջ ստեղծել Դելիմիտացիայի ու սահմանային անվտանգության հարցերով Հայաստան-Ադրբեջան երկկողմ հանձնաժողով ու սկսել աշխատանքը», - ասաց նա:

Փաշինյանը նշեց, թե որն է այս հարցում իրենց մարտավարությունը. «Ճշտել սահմանների հարցում Ադրբեջանի պաշտոնական դիրքորոշումները, պաշտոնապես արձանագրել այդ նույն հարցում Հայաստանի դիրքորոշումները, մեր դիրքորոշումներում լինել մաքսիմալ լեգիտիմ, այսինքն սահմանների ճշգրտման հարցում օգտագործել միայն դե յուրե նշանակություն ունեցող փաստեր ու փաստարկներ, այդ լեգիտիմության ճանաչումը ստանալ միջազգային հանրության շրջանում և այս հենքի վրա համաձայնության հասնել Հայաստան-Ադրբեջան սահմանների վերաբերյալ։

Ինչ է սա նշանակում։ Նշանակում է, որ դելմիտացիայի գործընթացում հիմնվել Հայաստանի տարածքի ճշգրտման համար դե յուրե նշանակություն ունեցող փաստերի և ոչ թե ցանկությունների կամ զրույցների վրա»։

Վարչապետը նշեց, որ Բրյուսելում ոչ թե զրոյից պայմանավորվածություն է ձեռք բերվել սահմանագծման վերաբերյալ, այլ վերջնական հանգրվանի են հասցվել 2021 թվականի նոյեմբերի 26-ին Սոչիում ձեռք բերված պայմանավորվածությունները, բայց այս ամենը հիմք է ստեղծել, որ անհրաժեշտության դեպքում թե Ռուսաստանի, թե Արևմտյան ու թե մյուս բոլոր գործընկերները իրենց փորձառությամբ անհրաժեշտ աջակցություն ցուցաբերեն սահմանների դելիմիտացիայի աշխատանքներին: