Silicon Mountains 2026․ տեխնոլոգիաներ, նորարարություն և ներդրումներ՝ մեկ հարթակում

ՀՀ բարձր տեխնոլոգիական արդյունաբերության և արհեստական բանականության նախարարության աջակցությամբ նոյեմբերի 3-4-ը Երևանում կանցկացվի «Silicon Mountains 2026» միջազգային տեխնոլոգիական գագաթնաժողովը և ցուցահանդեսը։ Նախարարությունը ցուցահանդեսին հանդես կգա նաև առանձին տաղավարով։

Այս տարի «Silicon Mountains»-ն առաջին անգամ կընդլայնի իր ձևաչափը՝ գագաթնաժողովին զուգահեռ ներառելով տեխնոլոգիական ցուցահանդես։ «Invest in Innovation» («Ներդրում նորարարության մեջ») խորագրով միջոցառումը նպատակ ունի խթանել տեխնոլոգիական ոլորտում գիտելիքի և փորձի փոխանակումը, համագործակցությունն ու ներդրումային հնարավորությունների բացահայտումը։

Երկօրյա միջոցառման շրջանակում նախատեսվում են՝

• տեխնոլոգիական ցուցադրական տաղավարներ՝ հայկական և միջազգային ընկերությունների մասնակցությամբ,
• արհեստական բանականությանը, տիեզերական տեխնոլոգիաներին և կիսահաղորդչային արդյունաբերությանը նվիրված քննարկումներ,
• միկրոէլեկտրոնիկայի միջազգային ֆորում,
• գործնական աշխատարաններ և B2B հանդիպումներ:

Միջազգային խոսնակների թվում են X-energy-ի գործադիր նախագահ և համահիմնադիր Քամ Ղաֆֆարյանը (Kam Ghaffarian), ինչպես նաև Cisco-ի, Nokia-ի, SEMI Europe-ի և այլ միջազգային տեխնոլոգիական կազմակերպությունների ներկայացուցիչներ։

«Silicon Mountains 2026»-ը հնարավորություն է հայկական տեխնոլոգիական ընկերությունների և ստարտափների համար՝ ներկայացնելու իրենց լուծումները, ընդլայնելու միջազգային կապերը և ձևավորելու նոր գործարար համագործակցություններ։

Միջոցառման կազմակերպիչն է ՏՀՏ գործատուների միությունը (UEICT)։