Գերմանիայում խաղաղ երթերը վերածվել են անկարգությունների, վանդալիզմի և խանութների թալանի

Գերմանիայի ավելի քան 30 քաղաքներում տեղի են ունեցել երիտասարդական ցույցեր, որոնք կազմակերպել է «Gen Z regelt» («Սերունդ Z-ը որոշում է») նախաձեռնությունը։ Բողոքի ակցիաներին մասնակցել է ավելի քան 100 հազար մարդ: Խաղաղ երթերը երեկոյան ժամերին մի շարք խոշոր քաղաքներում վերածվել են անկարգությունների, ոստիկանության հետ բախումների, վանդալիզմի և խանութների թալանի:

Ամենաթեժ բախումները եղել են Ֆրանկֆուրտում, որտեղ ցուցարարները կոտրել են խանութների ցուցափեղկերը, ինչպես նաև քարեր ու «Մոլոտովի կոկտեյլներ» են նետել իրավապահների ուղղությամբ։ Ոստիկանությունը կիրառել է ջրցան մեքենաներ։

Բեռլինում անցկացված երկու խոշոր ակցիաների ընթացքում բախումների հետևանքով վիրավորվել է 27 ոստիկան, և բերման է ենթարկվել շուրջ 56 մարդ։ Քյոլնում արգելված երթը Մայր տաճարի հարակից տարածքում վերածվել է բախման, ոստիկանները դարձյալ ջրցաններ են գործի դրվել:

Համբուրգում սևազգեստ ցուցարարները կայարանի մոտ բարիկադներ են այրել ու քարեր նետել իրավապահների ուղղությամբ, ձերբակալվել է շուրջ 120 հոգի։ Անկարգություններ ու խախտումներ են արձանագրվել նաև Բրեմենում, Շտուտգարտում և Մյունխենում․ ամբողջ երկրում ձերբակալվածների թիվն անցնում է 200-ից:

Այս ակցիաների մասնակիցները հիմնականում բողոքում են կյանքի թանկացման, գների աճի դեմ՝ պահանջելով սոցիալական աջակցություն և բյուջեի արդար բաշխում: Բացի այդ, երիտասարդները հանդես են գալիս հանուն կրթության որակի բարելավման, կլիմայի պաշտպանության, ինչպես նաև դեմ են պարտադիր զինվորական ծառայության վերականգնմանը:

Գերմանիայի իշխանություններն ու ոստիկանությունը գիշերային բռնությունների և թալանի համար մեղադրել են ցուցարարների շարքեր մտած ձախ ծայրահեղականներին։ Նրանց խոսքով՝ այս անկարգությունները երիտասարդական բողոքի ավելի մեծ ալիքի մաս են, որն այս աշնանը տարածվել է նաև Ֆրանսիայում, Բելգիայում և Իտալիայում։