Սպիտակի քաղաքապետարանի կայքն ադրբեջանցիների կողմից ենթարկվել է հաքերային հարձակման. աշխատակազմի քարտուղար

Սպիտակի քաղաքապետարանի պաշտոնական կայքը ենթարկվել է հաքերային հարձակման. տեղեկությունը Tert.am-ի հետ զրույցում հաստատեց Սպիտակի քաղաքապետարանի աշխատակազմի քարտուղար Անահիտ Գյուլազյանը:

Նա նշեց, որ հարձակումն իրականացվել է ադրբեջանցի հաքերների կողմից երեկ գիշերը, իսկ առավոտյան կայքի աշխատանքը հաջողվել է վերականգնել:

«Կոտրել էին կայքէջը: Առանձին նկարների տեղը երկու նկար էին տեղադրել ու կողքին գրել՝ «Խոջալուի գենոցիդ»: Հարձակումը տեղի է ունեցել երևի գիշերվա ընթացքում, որովհետև առավոտը մենք արդեն նկատեցինք ու փոխեցինք»-ասաց նա:

Գյուլազյանի խոսքով՝ ադմինիստրատորի օգնությամբ հաջողվել է վերականգնել կայքի աշխատանքը, և այլ վտանգներ այս պահին չկան:

«Թե ինչ ինֆորմացիա են վերցրել, բնականաբար չենք կարող ասել: Մեկ էլ ջնջել էին կայքը շահագործողների՝ user-ների անունները:

Ամեն բաժին իր պատասխանատուն ունի, իրենց տվյալներն էին ջնջել: Դե պետք է ամրացվի կայքի պաշտպանությունը, ինչքան հնարավոր է, մեր կողմից արվում է»,-ասաց նա:

Սպիտակի քաղաքապետարանի աշխատակազմի քարտուղարի խոսքով՝ սա հաքերային նմանատիպ հարձակման երկրորդ դեպքն է: Նախորդը հարձակումը տեղի էր ունեցել 2 տարի առաջ, երբ հաքերները կոտրել էին կայքն ու այնտեղ տեղադրել էին ադրբեջանական դրոշի նկարներ:

Այս պահին, Գյուլազյանի խոսքով, Սպիտակի քաղաքապետարանի կայքը բնականոն աշխատում է: