Իրանում մի շարք ձերբակալություններ են իրականացվել ահաբեկչությունների առնչությամբ

Իրանի հետախուզության և ազգային անվտանգության նախարարությունը հայտարարել է, որ Թեհրանում տեղի ունեցած հարձակումների առնչությամբ կարողացել են հայտնաբերել և ձերբակալել ևս մի քանի կասկածյալի: Այդ մասին հայտնում է Tasnim գործակալությունը:

Ձերբակալություններն իրականացրել են նախարարության ուժերը՝ Իսլամական հեղափոխության պահապանների կորպուսի և իրավապահ մարմինների հետ համագործակցությամբ:

Ահաբեկիչների ձերբակալության համար ձեռնարկված գործողության ընթացքում հետախուզության ուժերը հայտնաբերել են մեծ քանակությամբ զենք և ռումբի բաղադրիչներ, պայթուցիկ գոտիներ, կապի միջոցներ և կեղծ փաստաթղթեր: Բացի այդ, հայտարարության համաձայն, երկրի հյուսիս-արևմուտքում վահաբիստ-թաքֆիրիստների կողմից օգտագործվող մի քանի տներ են հայտնաբերվել և «մաքրվել» ահաբեկիչներից:

Նախարարության հայտարարությունից առաջ գործակալությունը, վկայակոչելով ոստիկանությանը, հայտնել էր, որ Իրանի ոստիկանությունը Թեհրանում չորեքշաբթի տեղի ունեցած ահաբեկչություններին առնչության կասկածանքով երկու կասկածյալի է ձերբակալել: Ձերբակալություններն իրականացվել են Իրանի Քերմանշահ շրջանում հակաահաբեկչական գործողություններից մեկի շրջանակում: Հինգշաբթի գիշերը նույն շրջանում իրականացված մեկ այլ հակաահաբեկչական գործողության ժամանակ ոստիկանությունը 92 ատրճանակ է առգրավել ավտոմեքենայի միջից:

Հինգշաբթի ավելի վաղ Հետախուզության և ազգային անվտանգության նախարարությունը հրապարակել է սպանված հինգ ահաբեկիչների անունները:

Նախարարության հայտարարության համաձայն՝ խորհրդարանում հարձակում իրականացրած հինգ հարձակվողները քրեական անցյալով ահաբեկիչներ էին, որոնք կապված էին «վահաբիստական և թաքֆիրիստական խմբերի» հետ:

ԻՊ-ին միանալուց հետո հինգ ահաբեկիչները հեռացել էին Իրանից և ներգրավված էին Իրաքի Մոսուլ և Սիրիայի Ռաքքա քաղաքում ահաբեկչական խմբավորման գործողություններում:

Հիշեցնենք, որ չորեքշաբթի հարձակում է տեղի ունեցել Իրանի խորհրդարանի շենքում և Իմամ Խոմեյնիի դամբարանում: Ահաբեկչական հարձակումների հետևանքով զոհերի թիվը հասել է 17-ի: Երկրի ներքին գործերի փոխնախարար Հոսեյն Զոլֆաքարին հայտնել էր, որ ահաբեկիչները խորհրդարան էին մտել կանանց հագուստով:

Նշենք, որ երկրի հետախուզության և ազգային անվտանգության նախարարությունը հայտարարել էր, որ Թեհրանում նախատեսվում էր իրականացնել 3 ահաբեկչական հարձակում, որոնցից մեկը տապալվել է, իսկ դրա հեղինակները՝ հինգ հոգի, ձերբակալվել են մինչ հարձակման իրականացումը:

Հարձակումների պատասխանատվությունը ստանձնել է «Իսլամական պետություն» խմբավորումը:

tert.am