Կաչինսկի. Եվրոպայի դեմ պատերազմ է վարվում

Եվրոպայի դեմ պատերազմ է վարվում: Այս մասին հայտարարել է Լեհաստանի իշխող «Իրավունք եւ արդարություն» կուսակցության նախագահ Յարոսլավ Կաչինսկին՝ մեկնաբանելով Լոնդոնի շաբաթօրյա ահաբեկչությունը, փոխանցում է Լեհաստանի ռադիոն:

«Կա՛մ Եվրոպան, մեջբերելով Լեհաստանի վարչապետին, ոտքի կկանգնի եւ կսկսի լրջորեն մտածել դիմակայության մասին, ինչն ամենից առաջ նշանակում է քաղաքական կոռեկտությունից հրաժարում, կա՛մ նման կարգի իրադարձությունները կկրկնվեն, իսկ եվրոպացիների կենսակերպը կընթանա հնարավոր ճանապարհներից ամենավատթարով»,- ասել է Յարոսլավ Կաչինսկին:

Նրա խոսքով՝ սա գլխավորապես վերաբերում է ոչ այնքան Եվրամիությանը, որքան նրա առանձին երկրներին: «Երկրները պետք է ուղղակի տարբերակեն սպառնալիքները: Դրանք Եվրոպայի ներսում են թաքնված, սակայն կան նաեւ արտաքին սպառնալիքներ: Անհրաժեշտ է սկսել դրանց դեմ պայքարել եւ դաժանորեն պայքարել: Եվրոպայի դեմ պատերազմ է վարվում, եւ անհրաժեշտ է դրան համապատասխան մեթոդներով պատասխանել՝ քաղաքական եւ անհրաժեշտության դեպքում այլ»,- ասել է նա՝ հավելելով, որ Լեհաստանն առաջին հերթին պետք է պաշտպանի այն անդորրը, որն ունի:

«Որքան հզոր լինենք, այնքան լավ կլինի: Մենք պետք է զարգացնենք մեր զինված ուժերը: Մենք պետք է հիշենք, որ սա պատերազմի նոր տեսակ է, բայց սա պատերազմ է»,- ասել է Յարոսլավ Կաչինսկին:

Հիշեցնենք, որ հունիսի 3-ի լույս 4-ի գիշերը Լոնդոնում իրականացված ահաբեկչությունների հետեւանքով 7 մարդ է զոհվել, 48 վիրավոր կա: Լոնդոնի կամրջի վրա հարձակմանը երեք ահաբեկիչ է մասնակցել: Նրանք գնդակահարվել են ոստիկանություն առաջին ահազանգից 8 րոպե անց:

NEWS.am