Աշխարհում ավելի քան 2.7 մլն երեխաներ ինտերնատներում են ապրում

Աշխարհում ավելի քան 2.7 մլն երեխաներ մանկատներում, ինտերնատներում եւ նմանատիպ այլ հաստատություններում են ապրում: Այս մասին նշված է հունիսի 1-ին ՄԱԿ-ի Մանկական հիմնադրամի (ՅՈՒՆԻՍԵՖ) կայքում հրապարակված հաղորդագրությունում:

Սա նշանակում է, որ 100 հազար երեխաներից 120-ը մանկատներում է: Կենտրոնական եւ Արեւելյան Եվրոպայում այս ցուցանիշը միջինից բարձր է 5 անգամ. 100 հազար երեխայից ինտերնատներում եւ մանկատներում է 666-ը:

DW-ի փոխանցմամբ՝ առանց այդ էլ ընտանիքից բաժանվելու հետեւանքով խոցելի երեխաները մանկատներում բախվում են բռնության, բռնաբարության, նրանց սոցիալական եւ էմոցիոնալ զարգացման խախտման վտանգի:

ՅՈՒՆԻՍԵՖ-ը վերլուծել է 140 պետություններում տիրող իրավիճակը: Կազմակերպությունում նաեւ նշել են, որ բազմաթիվ երկրներում հստակ տեղեկություններ չկան կամ տվյալներ չեն տրամադրում այն մասին, թե քանի երեխա է ապրում մասնավոր հաստատություններում:

 NEWS.am