Ամերիկյան տեխնոլոգիական ընկերությունների բաժնետոմսերը անկում են ապրել

Ամերիկյան տեխնոլոգիական ընկերությունների բաժնետոմսերը կտրուկ անկում են ապրել։ Ներդրողները կարծում են, որ դեմոկրատների՝ ընտրություններում հաղթանակից հետո արհեստական բանականության զարգացումը կդանդաղի։

Նախօրեին առեւտրային նստաշրջանի արդյունքներով ամերիկյան ֆոնդային ինդեքսները կտրուկ անկում են գրանցել. Dow Jones-ը նվազել է 3,44 տոկոսով, S&P 500-ը՝ 4,36 տոկոսով, իսկ տեխնոլոգիական Nasdaq-ը՝ 5,52 տոկոսով։ Reuters-ը նշում է, որ Nasdaq-ը մեկ օրում այսքան կտրուկ չէր նվազել արդեն 19 ամիս։

Շուկայի արժեքը նվազել է ավելի քան 2 տրիլիոն դոլարով։ Սա Nasdaq-ի պատմության մեջ ամենախոշոր անկումն է, եթե այն չափվի դրամական արտահայտությամբ, այլ ոչ թե տոկոսներով, գրում է The Wall Street Journal-ը։

Խոշորագույն ընկերությունների բաժնետոմսերի՝ Tesla-ի, Palantir-ի, Intel-ի, SpaceX-ի եւ Micron-ի գները նվազել են 5-10 տոկոսով։ Անկման առաջատարներն են միկրոսխեմաներ արտադրող ընկերությունները. հիշողության սարքեր արտադրող SanDisk-ի բաժնետոմսերը նվազել են 19 տոկոսով, իսկ կոշտ սկավառակներ արտադրող Western Digital-ինը՝ 16,5 տոկոսով։

Ուոլ Սթրիթում անկայունության ինդեքսը բարձրացել է 40 տոկոսով՝ հասնելով Իրանի դեմ պատերազմի առաջին շաբաթներից ի վեր ամենաբարձր մակարդակին։

Վերլուծաբանները նշում են, որ անկումը պայմանավորված է բացասական սպասումներով. դեմոկրատ նահանգապետերը կսահմանափակեն տվյալների մշակման նոր կենտրոնների կառուցումը։ Այս շաբաթ նահանգապետերի մի շարք ընտրություններում դեմոկրատական կուսակցության հաղթանակից հետո նման մտավախություններ են առաջացել, գրում է The Guardian-ը։

Դեմոկրատները խոստացել էին տվյալների մշակման կենտրոնների կառուցման մորատորիում սահմանել կամ դրանք խիստ վերահսկողության տակ վերցնել։ ԱՄՆ ընտրողները նաեւ երկրի տարբեր հատվածներում անցկացված մի շարք տեղական հանրաքվեներում մերժել են տվյալների մշակման կենտրոններ կառուցելու առաջարկները։

Տեխնոլոգիական ընկերությունների բաժնետոմսերի շուկայում տեղի ունեցողը «լիակատար կապիտուլյացիային համարժեք իրադարձություն» է, The Guardian-ին ասել է ներդրումային ռազմավար Նիլ Ուիլսոնը։