Հայաստանի` ՀԱՊԿ-ին անդամակցության հարցը կորոշվի կազմակերպության քննարկումներից հետո

Հայաստանի հետագա մասնակցությունը Հավաքական անվտանգության պայմանագրի կազմակերպությանը (ՀԱՊԿ) կորոշվի միավորման շրջանակներում անցկացվող քննարկումների արդյունքում, հայտարարել է Ռուսաստանի նախագահի մամուլի քարտուղար Դմիտրի Պեսկովը։

«Դուք գիտեք, որ Երևանն այժմ դե ֆակտո չի մասնակցում ՀԱՊԿ աշխատանքներին։ Դուք լսել եք Երևանի պաշտոնական հայտարարությունը ՀԱՊԿ-ին մասնակցության նպատակահարմարության վերաբերյալ»,- ասել է Կրեմլի ներկայացուցիչը։

Պեսկովը նշել է, որ կազմակերպության կանոնադրական փաստաթղթերը նման դեպքերի համար որոշակի ընթացակարգեր են նախատեսում։ «Հետագայում ամեն ինչ կախված կլինի նրանից, թե ինչպիսի քննարկումներ կկայանան կազմակերպության շրջանակներում»,- հավելել է ՌԴ նախագահի մամուլի քարտուղարը։

Նոյեմբերի 5-ին վարչապետ Նիկոլ Փաշինյանը հայտարարել է, որ Երևանի հետաքրքրությունը ՀԱՊԿ-ի նկատմամբ վերջնականապես սպառված է։ «Ես կցանկանայի, որ մենք մեկընդմիշտ արձանագրեինք, որ մեր հետաքրքրությունը ՀԱՊԿ-ի նկատմամբ սպառվել է, և մենք հետաքրքրություն չունենք ՀԱՊԿ-ի նկատմամբ»,- ասել էր Փաշինյանը։

Հոկտեմբերի 23-ին ՀԱՊԿ գլխավոր քարտուղար Տաալատբեկ Մասադիկովը չի բացառել Հայաստանի անդամակցության հարցի քննարկումը նոյեմբերի 11-ի գագաթնաժողովում։ Նա նշել է, որ Երևանը փաստացի չի մասնակցում կազմակերպության աշխատանքներին, թեև նրա ներկայացուցիչը շարունակում է այցելել մշտական խորհրդի նիստերին։