Բաղդադը պահանջում է առանց վերապահումների չեղարկել քրդական հանրաքվեն

Բաղդադը պահանջում է ոչ թե սառեցնել իրաքյան Քուրդիստանի անկախության հանրաքվեի արդյունքները, այլ ընդհանրապես չեղյալ հայտարարել հանրաքվեն:

Հոկտեմբերի 24-ին իրաքյան Քուրդիստանի ղեկավարներն առաջարկել են «անհապաղ հաստատել հրադադար», խոստանալով դրա դիմաց «սառեցնել հանրաքվեի արդյուքները և Իրաքի Սահմանադրության հիման վրա սկսել բանակցություններ դաշնային կառավարության հետ»: Սակայն պաշտոնական Բաղդադը մերժել է այդ առաջարկը:

«Մեզ համար ընդունելի է միայն հանրաքվեի չեղարկումը և հարգանքը Սահմանադրության նկատմամբ», - այսօր հայտարարել է Իրաքի վարչապետ Հայդեր ալ-Աբադին, ով հիմա գտնվում է Իրանում:

Իրաքյան Քուրդիստանում սեպտեմբերի 25-ին տեղի ունեցած հանրաքվեի մասնակիցների մոտ 93 տոկոսը քվեարկել է հօգուտ անկախության:

Պաշտոնական Բաղդադը, ինչպես նաև Թեհրանը, Անկարան և միջազգային համայնքը հանրաքվեն չեն ճանաչում:

Իրաքյան ուժերն Իրանի աջակցությամբ գործող շիա զինյալների հետ անցած շաբաթ գրավել են փեշմերգայի՝ քրդական զինված ջոկատների հսկողության տակ գտնվող նավթով հարուստ Քիրքուքի շրջանը:

Փեշմերգան անցած տարիների ընթացքում կարողացել էր այդ շրջանից դուրս մղել «Իսլամական պետության» ստորաբաժանումները:

Քրդերի և շիա զինյալների միջև վերջին օրերին տեղի ունեցած բախումներում երկու կողմից զոհվել են տասնյակ մարտիկներ:

Այս թեմայով Ռուսաստանը Իրաքի քրդերին հորդորում է բանակցել Բաղդադի հետ Իրաքյան Քուրդիստանում հրապարակվել են անկախության հանրաքվեի վերջնական արդյունքները Իրաքի ԶՈւ բարձրաստիճան պատվիրակությունը մեկնել է Իրան Լեռնային Ղարաբաղը ողջունում է իրաքյան Քրդստանի անկախության հանրաքվեի անցկացումը Թուրքիան պատրաստ է օգնել Իրաքին տարածքային ամբողջականության պահպանման հարցում