Բաքվում կրկին ԶԼՄ-ների միջոցով Արցախի ներկայացուցիչներին հրավիրել են «հանդիպման»

Ադրբեջանի նախագահի աշխատակազմը եւս մեկ անգամ Արցախի ներկայացուցիչներին հրավիրել է «հանդիպման»։ АПА-ի հաղորդմամբ՝ այս մասին տեղեկությունը տարածել է Ադրբեջանի նախագահի աշխատակազմը:

«Ադրբեջանի Հանրապետության նախագահի աշխատակազմը՝ ի շարունակություն մարտի 1-ին Խոջալու քաղաքում կայացած հանդիպման եւ մարտի 13-ի հրավերի, Ղարաբաղի հայ հասարակության ներկայացուցիչներին եւս մեկ անգամ առաջարկում է ապրիլի առաջին շաբաթվա ընթացքում հանդիպում անցկացնել Բաքու քաղաքում՝ քննարկելու վերաինտեգրման հարցերը, ինչպես նաեւ Ղարաբաղում ենթակառուցվածքային նախագծերի իրականացումը»,-մեջբերում է լրատվամիջոցը:

Հիշեցնենք, որ Ստեփանակերտում հրաժարվել են քննարկել հանդիպման բովանդակության նման ձեւակերպումը՝ հայտարարելով, որ «վերաինտեգրման» մասին խոսք լինել չի կարող: Լեռնային Ղարաբաղում նաեւ հիշեցրել են, որ դիվանագիտական էթիկետը չի ենթադրում ԶԼՄ-ների միջոցով հրավերների փոխանցում, իսկ բանակցությունները հնարավոր են բացառապես հավասար պայմաններով, միջազգային մեխանիզմների շրջանակներում: