Իրաքյան Քուրդիստանի առաջնորդը հայտարարել է անկախության վերաբերյալ հանրաքվեում հաղթելու մասին

Իրաքյան Քուրդիստանի առաջնորդ Մասուդ Բարզանին նախքան ձայների վերջնահաշվարկը վստահաբար հայտարարել է, որ սեպտեմբերի 25-ին անցկացված անկախության հարցով հանրաքվեում իրենք հաղթել են:

Ինչպես նշում է The Guardian-ը, անկախության հարցով հանրաքվեի պաշտոնական արդյունքները հրապարակվելու են այսօր՝ սեպտեմբերի 27-ին. ենթադրաբար, Իրաքյան Քուրդիստանի անկախությանը կողմ քվեարկածները մեծամասնություն կկազմեն:

Իսկ մինչ այդ հարևան պետությունները կոչ են արել Բարզանիին մի կողմ դնել հանրաքվեի արդյունքներն ու ակտիվ քայլեր ձեռնարկել տարածաշրջանի անվտանգությունը պահպանելու համար:

«Եթե Բարզանին ու քրդական կառավարությունը հնարավորինս արագ հետ չկանգնեն այս սխալ քայլից, ապա պատմության մեջ կմնան որպես տարածաշրջանն էթնիկ ու կրոնական պատերազմի մեջ ներքաշած անամոթներ: Ամեն ինչ կավարտվի, երբ մենք փակենք նավթի ծորակները. նրանց բոլոր եկամուտները կանհետանան: Նրանք ի վիճակի չեն լինի սնունդ հայթայթել, երբ մեր բեռնատարները դադարեն Իրաքի հյուսիս գնալ»,-հայտարարել է Թուրքիայի նախագահ Ռեջեփ Թայիփ Էրդողանը:

Սրան ի պատասխան Բարզանին հայտարարել է, որ հանրաքվեի պաշտոնական արդյունքների հրապարակումից հետո իրենք պատրաստ են բանակցային գործընթաց սկսել Բաղդադի հետ: Բարզանիի խոսքով՝ սպառնալիքների միջոցով հնարավոր չէ ինչ-որ բան լուծել:

Հիշեցնենք, որ Իրաքյան Քուրդիստանում անկախության հարցով հանրաքվեին մասնակցած քաղաքացիների 93.29 տոկոսն «այո» է ասել անկախացմանը: Ավելի վաղ հայտնի է դարձել, որ հանրաքվեին մասնակցել է ընտրողների 72,16 տոկոսը:

Հանրաքվեին մասնակցելու իրավունք ուներ 5 մլն 200 հազ. ընտրող: Նշվում է, որ թուրքմենների մեծ մասը բոյկոտել է հանրաքվեն, մեծ ակտիվություն չեն ցուցաբերել նաև Քիրկուկի արաբները, մինչդեռ քիրկուկցի քրդերը վճռականորեն օգտագործել են իրենց ձայնը:

Նշենք, որ Իրաքի վարչապետ Հայդեր ալ Աբադին հանրաքվեն անվանել է հակասահմանադրական և հայտարարել է, որ Իրաքն այն չի ընդունելու:

ԱՄՆ-ի, Ֆրանսիայի, Գերմանիայի և ՄԱԿ-ի ներկայացուցիչներն Իրաքյան Քուրդիստանի ղեկավար Մասուդ Բարզանիի հետ հանդիպմանն առաջարկել էին հետաձգել հանրաքվեն: Նա, սակայն, հայտարարել էր, որ հանրաքվեն կկայանա նշանակված ժամկետներում, եթե նրան չառաջարեն այլընտրանք:

Նախօրեին Թուրքիայի նախագահ Ռեջեփ Թայիփ Էրդողանը սպառնացել էր Իրաքյան Քուրդիստանին՝ հայտարարելով, որ մի գիշեր կարող են անսպասելի խուժել երկրի տարածք:

Այս թեմայով Բաղդադը պահանջում է առանց վերապահումների չեղարկել քրդական հանրաքվեն Ռուսաստանը Իրաքի քրդերին հորդորում է բանակցել Բաղդադի հետ Իրաքյան Քուրդիստանում հրապարակվել են անկախության հանրաքվեի վերջնական արդյունքները Իրաքի ԶՈւ բարձրաստիճան պատվիրակությունը մեկնել է Իրան Լեռնային Ղարաբաղը ողջունում է իրաքյան Քրդստանի անկախության հանրաքվեի անցկացումը