Առանց վիրավորանքի. Մեծ Բրիտանիայի թագուհին, Քեմբրիջի դուքսն ու դքսուհին շնորհավորել են Մեգան Մարքլին 40-ամյակի կապակցությամբ և ուրախ տարեդարձ մաղթել
Մեծ Բրիտանիայի թագուհին, արքայազն Չարլզը, ինչպես նաև Քեմբրիջի դուքսն ու դքսուհին շնորհավորական ուղերձ են հղել Սասեքսի դքսուհի Մեգան Մարքլին ծննդյան 40-ամյակի առթիվ:
Ինչպես ներկայացնում է Daily Mail-ը, թագավորական ընտանիքի ինստագրամյան էջում բարեմաղթանքներ են հրապարակվել: Բուքինգհեմյան պալատի կողմից ինստագրամյան էջում հրապարակվել են Մեգան Մարքլի լուսանկարները` «Սասեքսի դքսուհուն շատ ուրախ տարեդարձ ենք մաղթում այսօր» գրությամբ:
Րոպեներ անց իրենց շնորհավորական ուղերձներն են հրապարակել արքայազն Ուիլյամն ու Քեյթ Միդլթոնը, ինչպես նաև արքայազն Չարլզն ու Քորնուոլի դքսուհի Կամիլան:
Հիշեցնենք, որ արքայազն Հարին և Սասեքսի դքսուհի Մեգանը հեռացել են Մեծ Բրիտանիայից` հրաժարվելով իրենց թագավորական պարտականություններից և բնակվում են Միացյալ Նահանգներում: Մեգան Մարքլի և արքայազն Հարիի` ամիսներ առաջ Օփրա Ուինֆրիին տված սկանդալային հարցազրույցից հետո հարաբերությունները նրանց և միապետական ընտանիքի մյուս անդամների միջև լարված էին: Մեգանն ու Հարին որոշ բացահայտումներ էին արել իրենց նկատմամբ վերաբերմունքի և անգամ դեռ չծնված առաջնեկի մաշկի հնարավոր մգության շուրջ խոսակցությունների մասին:
Արքայազն Հարին ընտանիքի անդամների հետ վերամիավորվել էր միայն պապի` Էդինբուրգի դուքս Ֆիլիպի հուղարկավորության ժամանակ ապրիլին: Դրանից հետո եղբայրներ, ինչպես նաև Հարին և արքայազն Չարլզը զրույցներ են ունեցել, սակայն նրանց հարաբերությունները վերջնականապես չեն հարթվել: