Մոլդովայի ընտրություններում իշխող կուսակցությունը ստանում է 52 տոկոս

Կիրակի օրը Մոլդովայի խորհրդարանի արտահերթ ընտրություններում նախագահական Գործողության եւ համերաշխություն կուսակցությունը (ԳՀԿ) ստանում է 52.3 տոկոս, կոմունիստների եւ սոցիալիստների ընտրական բլոկը՝ 27.4 տոկոս, իսկ «Շոր» կուսակցությունը՝ 5.8 տոկոս: Այս մասին հայտնել է Կենտրոնական ընտրական հանձնաժողովը արձանագրությունների 99 տոկոսի մշակումից հետո:

Այդ տվյալների համաձայն՝ մնացած 18 կուսակցությունները եւ եւս մի ընտրական դաշինք չեն հաղթահարում շեմն ու չեն մտնում օրենսդիր մարմին: Քվեարկության ընթացքում ԿԸՀ-ն եւ դիտորդները չեն հայտնել խախտումների մասին, որոնք կարող են ազդել կամարտահայտման արդյունքների վրա: Վերջնական արդյունքներն ամփոփումից հետո դրանք կուղարկվեն հաստատման երկրի Սահմանադրական դատարան:

Խորհրդարանի լուծարումը նախաձեռնել է 2020-ի նախագահական ընտրություններում հաղթած արեւմտամետ քաղաքական գործիչ Մայա Սանդուն, ով իր ծրագրի համար աջակցության կարիք ունի նոր խորհրդարանի ու կառավարության կողմից: