Մոլդովայի ԿԸՀ-ն կոչ է արել խորհրդարանական ընտրությունները համարել կայացած

Կիրակի Մոլդովայում ընթացող արտահերթ խորհրդարանական ընտրություններին ընտրողների մասնակցությունը ներկայում գերազանցել է 33,3 տոկոսը, ինչը թույլ է տալիս ընտրությունները ճանաչել՝ որպես կայացած, հաղորդում է ՌԻԱ Նովոստի-ն:

«Ընտրություններին մասնակցել է ընտրողների ավելի քան մեկ երրորդը. դրանք կարող են համարվել կայացած»,-ասել է հանրապետության ԿԸՀ մամուլի քարտուղար Ռոդիկա Սիրբուն:

ԿԸՀ-ի տվյալներով՝ Մոլդովայում քվեարկությանը հասցրել է մասնակցել ավելի քան 982 հազար մարդ: Արտերկրում քվեարկել է ավելի քան 132 հազար ընտրող: Ամենաակտիվը քվեարկում են Մոկդովայի 26-40 տարեկան քաղաքացիները:

Ընտրություններում մասնակցում է 22 կուսակցություն եւ դաշինք, ինչպես նաեւ մեկ անկախ թեկնածու: Հիմնական պայքարը ծավալվում է «Գործողություն եւ համերաշխություն» կուսակցության, որը նախքան նախագահի պաշտոնը ստանձնելը գլխավորել է Մայա Սանդուն, եւ «Կոմունիստներ ու սոցիալիստներ» դաշինքի միջեւ, որը գլխավորել են երկրի երկու նախկին նախագահներ Վլադիմիր Վորոնինն ու Իգոր Դոդոնը: