ՌԴ դեսպանը՝ խաղաղապահների գտնվելու ժամկետի երկարաձգման մասին. Ապրենք այս օրով եւ աշխատենք ապագայի համար
Կոչ եմ անում ելնել գոյություն ունեցող իրողությունների վրա: Այս մասին հուլիսի 7-ին լրագրողներին հետ զրույցում ասաց ՀՀ-ում ՌԴ արտակարգ եւ լիազոր դեսպան Սերգեյ Կոպիրկինը՝ պատասխանելով հարցին՝ կերկարաձգվի՞ արդյոք Ղարաբաղում ռուս խաղաղապահների գտնվելու ժամկետը:
Նա նշեց, որ զորամիավորումը գործում է, եւ, ըստ դեսպանի, գործում է բավականին արդյունավետ: «Ելնենք դրանից: Ինչ վերաբերում է ապագային, եկեք ապրենք այս օրով, իհարկե՝ մտածելով ապագայի մասին, աշխատելով հանուն ապագայի»,- ասաց Կոպիրկինը:
Հիշեցնենք, որ 2020 թվականի նոյեմբերի 9-ի եռակողմ հայտարարության համաձայն, ռուս խաղաղապահների՝ Ղարաբաղում գտնվելու ժամկետը հինգ տարի է՝ դրա երկարացման հնարավորությամբ: