ԿԺԴՀ-ն հետևում է ԱՄՆ-ի և Հրվ. Կորեայի զորավարժություններին և սադրանքի դեպքում պատրաստ է հարված հասցնել

ԿԺԴՀ-ն ուշադիր հետևում է երկուշաբթի մեկնարկած ԱՄՆ-ի և Հարավային Կորեայի «Ըլչի-Ֆրիդոմ գարդիան» (Ulchi Freedom Guardian, UFG) զորավարժություններին և սադրանքի դեպքում պատրաստ է կանխարգելիչ հարված հասցնել: Այդ մասին «ՌԻԱ Նովոստի»-ին հայտնել է ՌԴ-ում ԿԺԴՀ-ի ժամանակավոր հավատարմատար Զին Չժոն Հեպը:

«Մեր բանակը և ժողովուրդը, որին առաջնորդում է հարգելի ընկեր Կիմ Չեն Ընը, հետևում են թշնամիների այդ թշնամական գործողություններին և ամեն պահի պատրաստ են կանխարգելիչ հարված հասցնել, եթե լինեն սադրանքներ»,- ասել է նա:

Ավելի վաղ հաղորդվել է, որ Միացյալ Նահանգներն ու Հարավային Կորեան «Ըլչի-Ֆրիդոմ գարդիան» անվամբ համատեղ տասնօրյա զորավարժություններ են սկսում:

Չնայած ԱՄՆ-ն և Հարավային Կորեան պնդում են, որ զորավարժությունները պաշտպանական բնույթ են կրում, ԿԺԴՀ-ն դատապարտել է դրանց անցկացումը՝ նախազգուշացնելով, որ դրանք կարող են հանգեցնել աղետալի հետևանքների: Փհենյանում վստահ են, որ զորավարժությունների նպատակը Հյուսիսային Կորեայի տարածք ներխուժման նախապատրաստումն է:

Կորեայի կենտրոնական հեռագրային գործակալությունն ավելի վաղ հայտարարել էր, որ Փհենյանն ուսումնասիրում է ցանկացած պահի գործողության միջին և մեծ շառավղով «Հվասոն -12» հրթիռներով Գուամ կղզում Միացյալ Նահանգների ռազմաբազաներին հարվածելու վերաբերյալ ծրագիրը: Սրան ի պատասխան ԱՄՆ նախագահ Դոնալդ Թրամփն ասել էր, որ Գուամին հարվածելու դեպքում, ԱՄՆ-ն Հյուսիսային Կորեայի հետ այնպիսի բան կանի, որ նախկինում ոչ ոք չէր տեսել:

Այնուհանդերձ՝ վերջին շրջանում 2 պետությունների ղեկավարները նախընտրել են մի կողմ դնել ռազմաշունչ հայտարարությունները: Մասնավորապես՝ Կիմ Չեն Ընն ասել է, որ պատրաստ է միառժամանակ հետաձգել Գուամին հարվածելու որոշման իրականացումն ու տեսնել, թե ԱՄՆ-ն իրեն ինչպես կդրսևորի, իսկ Թրամփը հավանություն է տվել այս որոշմանը: