85 օրից 54 օրն Արմեն Սարգսյանը Հայաստանում չի եղել. գտնվել է արտասահմանում՝ մոտ 7 երկրում

2021 թվականի հուլիսի 1-ից մինչև հոկտեմբերի 31-ը 122 օր է, որոնցից աշխատանքային՝ 85 օր, այս 85 օրից 54 օրը Հանրապետության նախագահն անցկացրել է ոչ Հայաստանում: Այս մասին, այսօր՝ նոյեմբերի 3-ին, ԱԺ հանձնաժողովների նիստում 2022 թվականի բյուջեի նախագծի քննարկման ժամանակ նշեց Ազգաին ժողովի «Հայաստան» խմբակցության պատգամավոր Աղվան Վարդանյանը:

Նրա խոսքով՝ այդ օրերին Արմեն Սարգսյանը գտնվել է արտասահմանում՝ մոտ 7 երկրում:

«Տեսեք, նախագահը պետական կարևորագույն ինստիտուտներից մեկն է ու, երբ այդ ինստիտուտի բոլոր ծախսերի մոտ 25-30 տոկոսը կազմում են միայն արտասահմանյան գործուղումների վրա ծախսերը, ինձ մոտ մի տեսակ թյուրըմբռնում է առաջանում՝ որքանո՞վ է այդ ինստիտուտը իր գործառույթներով զբաղվում», - ասաց ընդդիմադիր պատգամավորը:

ՀՀ նախագահի աշխատակազմի ղեկավարի տեղակալ Խաչատուր Պողոսյանն էլ ասաց, թե վերլուծել՝ բյուջեով նախագահի աշխատակազմի համար նախատեսված այսքան տոկոսն օգտագործվում է գործուղումների համար, նման վերլուծություն չունեն:

«Ասել, թե արդյունավե՞տ է ՀՀ նախագահի՝ օրերս Գլազգո կատարած այցելության կամ՝ դրանից առաջ Իտալիա այցի ծախսերի արդյունավետությունը, մենք նման վերլուծություն չունենք, մենք ուղղակի փորձում ենք մեզ համար նախատեսված միջոցներով, ավելին չպահանջելով, կազմակերպել ՀՀ նախագահի բնականոն գործունեությունը», - ասաց Պողոսյանը: