Երեկ ադրբեջանական դրոշներով շքերթ էր Սյունիքի մայրուղում, իսկ ինքը եկել էր ակտերը ջրեր․ Նարեկ Մալյանը՝ Փաշինյանի մասին

Գորիսի քաղաքապետ Առուշ Առուշանյանին մեկուսացրել են ռեպրեսիայի ամենալկտի դրսեւորմամբ, ինչի արձագանքը հանրությունը տալիս է եւ տալու է։ Այս մասին այսօր՝ դեկտեմբերի 21-ին, Քննչական կոմիտեի դիմաց լրագրողների հետ զրույցում ասաց «ՎԵՏՕ» շարժման ղեկավար Նարեկ Մալյանը։

«Ես տեղեկություններ ունեմ, որ ոստիկանության աշխատողների շրջանում եւս այսօր եղել են լուրջ դժգոհություններ։ Ոստիկանությունից եկել է ազդանշան դեպի քաղաքային իշխանություն, որ ցանկություն չկա ժողովրդի դեմ դուրս գալու։ Գորիսի քաղաքապետին մեկուսացրել են ոչ թե քաղաքական նպատակով այլ ռեպրեսիայի ամենակոշտ եւ ամենալկտի դրսեւորմամբ։ Իսկ այդ լկտի դրսեւորմանը հանրությունն իր արձագանքը տալիս է եւ տալու է»,- նշեց Նարեկ Մալյանը։

Անդրադառնալով այն միջադեպին, երբ հոգեւորականը հրաժարվեց սեղմել Նիկոլ Փաշինյանի ձեռքը, Նարեկ Մալյանը նշեց, որ ներում հայցող մարդը պետք է ապաշխարհության փուլով անցնի, սակայն Նիկոլ Փաշինյանի մոտ ներում ստանալու ցանկություն ինքը չի նկատում։

«Տգետներին լուսաբանեմ, որ հոգեւորականներին ձեռքով չեն բարեւում, նման բան չի կարելի էթիկայի կանոններից դուրս։ Եթե ինքը հայտարարել էր մի տարի առաջ, որ ծնկի բերելու հոգեւորականներին, ի՞նչ էր սպասում էր՝ այդ մարդիկ ինքնասիրություն, պատիվ չունե՞ն, բոլորն իր նմա՞ն են։ Այո, ներելը քրիստոնեական գլխավոր դրսեւորումներից է, սակայն դա տեղի է ունենում միայն ապաշխարհելուց հետո։ Այն մարդը, որը ներման կարիք ունի, պարտադիր պետք է անցնի ապաշխարհման փուլը։ Ինչպես տեսնում եք, դավաճանների պարագլուխը, բացարձակապես չի զղջում իր արածների համար։ Նիկոլ Փաշինյանն առայսօր սատանայաբար թաքցնում է զոհվածների, անհետ կորածների, գերիների քանակը։ Իրեն փորձում է վերագրել, որոնք իր հետ կապ չունի։ Թաքցնում է վիրավորների քանակը, մենք չգիտենք նրանցից քանիսն արտասահմանում բուժման կարիք ունեն։ Հիմա այդ մարդն առանց ապաշխարհելու ներման ակնկալիք ունի։ Եկեղեցի մուտք գործողը, որը կարծում է, որ ներման կարիք ունի, ապաշխարհանքի փուլը պետք է անցնի։ Իսկ ես ապաշխարահանք չեմ տեսնում ոչ մեկի մոտ»,- ասաց Նարեկ Մալյանը։

Նարեկ Մալյանի կարծիքով՝ Սառնակունքում Փաշինյանին ջերմ դիմավորեցին անձնական նեղ շահերից ելնելով, սակայն Սառնակունքից առաջ Նիկոլ Փաշինյանը չկարողացավ գնալ, քանի որ Սյունիքի կորիզը մերժեց իրեն։

«Սառնակունքը Սյունիքի հենց առաջին համայնքն է։ Այսինքն՝ Սառնակունքից դավաճանը չկարողացավ շատ առաջ գնալ։ Ես հասկանում եմ այդ մարդկանց, որոնք մտածում են, որ վարչապետն է եկել, փորձենք մի բան կպցնել։ Տեսանք, որ այնտեղ ակտ ջրելու խոսակցություն տեղի ունեցավ։ Իրավական առումով ակտ ջրելու գործառույթ գոյություն չունի։ Վարչապետը, որ ստախոսի նման խոստացավ, որ ակտը կջրի, պետք է գնա ակտի վճարի։ Երեկ ադրբեջանական դրոշներով շքերթ էր Սյունիքի մայրուղում։ Այսինքն՝ այդ հարցի համար չէր եկել, եկել էր սառնաղբյուրցիների ակտերը ջրեր։ Ամեն տեղ, բնականաբար, կլինեն մարդիկ, որոնք կառաջնորդվեն նեղ անձնական շահերով։ Մենք տեսանք, որ Սյունիքում այդպիսի մարդիկ փոքրամասնություն են։ Գլխավոր մասը, Սյունիքի կորիզը նրան մերժեց հոգեւորականի տեսքով, բոլոր փողոցները եւ անգամ ուղղաթիռի վայրէջքի վայրը փակած սյունեցիների տեսքով»,- ավելացրեց Նարեկ Մալյանը։