AFP. Սիրիացի ապստամբները մասնակցում են պատերազմին ադրբեջանցիների համար` իրենց ընտանիքը կերակրելու համար

Սիրիայում պատերազմների պատճառով տեղահանված իր ընտանիքին հուսահատ կերպով օգնել ցանկացող թուրքական զինյալ Աբու Ահմադը սպասում է Ադրբեջան մեկնելուն, որտեղ հույս ունի վաստակել իր ներկայիս աշխատավարձի 80-ապատիկը, հայտնում է AFP-ն:

«Ես մեկ շաբաթ առաջ եմ գրանցվել` Ադրբեջանում պատերազմ գնալու համար... երեք ամսով` ամսական 2000 ԱՄՆ դոլարի դիմաց»,- ձայնային հաղորդագրությամբ AFP-ին հայտարարել է 26-ամյա զինյալը` կեղծանուն օգտագործելով անվտանգության նկատառումներով:

Գործակալությունը նշում է, որ Անկարան աջակցում է Ադրբեջանին, իսկ Երեւանը մեղադրում է Անկարային` իր սիրիացի աջակիցներին Բաքու ուղարկելու մեջ: Այս մեղադրանքին միացել է նաեւ Ֆրանսիան` չնայած ադրբեջանցիների բոլոր հերքումներին: Սակայն ֆրանսիական AFP գործակալությունը կարողացել է զրուցել սիրիական ընդդիմության մարտիկների հետ Հալեպից եւ Իդլիբից, ովքեր մեկնում են Ղարաբաղյան հակամարտության գոտի: Նրանցից մեկը Աբու Ահմադն էր: Թուրքամետ ապստամբների վերահսկողության տակ գտնվող Սիրիայի հյուսիսային ճամբարում գործակալությանը տված հարցազրույցում նա ասել է, որ գնում է Ղարաբաղ պատերազմի` հույս ունենալով ապահովել իր կնոջն ու երեխաներին:

«Մենք կորցրել ենք մեր գյուղերն ու տները եւ ուտելու բան չունենք: Ես սպասում եմ իմ հերթին` Ադրբեջան ուղեւորվելու համար, որպեսզի գումար կուտակեմ, վերադառնամ եւ ինչ-որ բիզնես սկսեմ»,- ասել է նա:

Աբու Ահմադը նշել է, որ ինքը եւ իր ընտանիքն այս տարի լքել են իրենց տունը Ռուսաստանի աջակցությամբ կառավարական զորքերի հարձակման ժամանակ` մարտին հաստատված զինադադարից առաջ, հաղորդում է France 24-ը: Նա հայտարարել է, որ իր եկամուտները նվազել են մինչեւ կոպեկներ, երբ մարտերը հիմնականում դադարեցվել են եւ անցյալ ամիս իր խմբից ընդամենը 200 թուրքական լիրա է (մոտ 25 դոլար) ստացել: Ահմադը նշել է, որ դա բավարար չէ ինը տարվա պատերազմով ավերված երկրում ընտանիք պահելու համար, որտեղ վերջին ամիսներին սննդամթերքի գները բարձրացել են: Լեռնային Ղարաբաղում զինյալների մահվան մասին լուրեր ստանալով` նա հասկանում է, որ իրեն վտանգ է սպառնում: «Բայց մենք այլ ելք չունենք: Մենք հասել ենք այն կետին, երբ պատրաստ ենք ինքներս մեզ զոհաբերել` մեր երեխաներին կերակրելու համար»,- ասել է նա:

Մարդու իրավունքների սիրիական դիտարանն ավելի վաղ հայտնել էր, որ թուրքական 850 սիրիացի զինյալ է մեկնել Թուրքիա, եւս հարյուրավոր զինյալ պատրաստվում է մեկնել: Նրանք բոլորը թուրքամետ ընդդիմադիր խմբավորումներից են: Կազմակերպությունից հայտնել են, որ նրանց խոստացել են «աշխատավարձ» վճարել 1500-ից 2000 ԱՄՆ դոլարի սահմաններում: Ընդ որում, առաջին գրոհայիններն Ադրբեջան են ժամանել դեռ պատերազմի մեկնարկից առաջ` կարծելով, որ իրենց բերել են նավթահանքերի ու սահմանի անվտանգության ապահովման համար:

Հալեպի նահանգի Աթարեբ քաղաքից մի զինյալ գործակալությանը հայտնել է, որ ինքն առաջնագծում է: «Այո, ես Ադրբեջանում եմ», - գրել է նա` հրաժարվելով այլ մանրամասներ ներկայացնել: Նրա հայրենի քաղաքից աղբյուրը հայտնել է, որ նա գտնվում է այն ստորաբաժանումում, որի հրամանատար Մոհամադ Շաաբան զոհվել է: Շաաբան չորս զինյալների թվում էր, որոնց լուսանկարները տեղադրվել էին սոցիալական ցանցերում: Հաղորդվում է, որ նրանք զոհվել են:

Մարդու իրավունքների պաշտպանության սիրիական դիտորդական խմբի ղեկավար Ռամի Աբդել Ռահմանը հայտնել է, որ կիրակի օրվանից առնվազն 28 սիրիացի զինյալ է զոհվել Լեռնային Ղարաբաղում բախումների արդյունքում: Նրանցից երեքի հարազատները հաստատել են նրանց մահվան փաստը: