The Times-ը Էրդողանի ելույթները նմանեցրել է ԽՍՀՄ կոմունիստական կուսակցության հռետորաբանությանը

Բրիտանական հեղինակավոր The Times պարբերականը, անդրադառնալով մեկ տարի առաջ Թուրքիայում տեղի ունեցած հեղաշրջման փորձին ու դրա մեկ ամյակին նվիրված միջոցառումներին, դրանք նմանեցրել է Խորհրդային միության տարիներին ժողովրդին պարտադրված տոնական քայլերթերին:
«Էրդողանի հռետորաբանությունը, կիրառած սպառնալիքներն ու արտահայտությունները կարծես ճիշտ Խորհրդային միության կոմունիստական կուսակցության արտադրանք լինեն», - գրում է The Times-ը:
Պարբերականը նշում է, որ Էրդողանը հաջողության հասավ՝ Թուրքիան ներկայացնելով որպես «արտաքին ուժերից» տուժած զոհ և կոչ անելով թուրք ժողովրդին զգոն մնալ «արտաքին թշնամիների» դեմ: Եվ այս ամենն այն դեպքում, երբ Արևմուտքի բոլոր երկրները դատապարտել են հեղաշրջման փորձը Թուրքիայում:
Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին: