Անգամ 30 ժամվա ծրագիր չունես, պարո՛ն Փաշինյան, ի՞նչ 30 տարվա ծրագրի մասին ես խոսում. Գևորգ Պետրոսյան (տեսանյութ)

«Բարգավաճ Հայաստան» կուսակցությունը պահանջում է կառավարության ամբողջական պաշտոնանկություն, որին պետք է հաջորդեն արտահերթ ընտրություններ, և ՀՅԴ-ի ու «Հայրենիք» կուսակցության հետ համատեղ հանրահավաքը լինելու է այդ օրակարգով: «Արմնյուզ» ՀԸ «#ՕրաԽնդիր» հաղորդման ժամանակ նման կարծիք է հայտնել ԱԺ «Բարգավաճ Հայաստան» խմբակցության անդամ Գևորգ Պետրոսյանը:

«Պետք է երկիրը մաքրել այս վիճակից, սուտը ստի հետևից է հնչում: Փաշինյանը նպատակ է հռչակել օլիմպիական 25 ոսկի ունենալ մինչև 2050 թվական, երբ ՀԱՕԿ-ի նախագահին քաղաքական հետապնդման են ենթարկում: ԿԳՄՍ այս նախարարը կարող է ոսկե մեդա՞լ բերել: Անգամ 30 ժամվա ծրագիր չունես, պարո՛ն Փաշինյան, ի՞նչ 30 տարվա ծրագիր ես ներկայացնում: Ոչ ոք չգիտե՝ երբ նա առավոտյան արթնանում է, ի՞նչ է որոշելու, որքա՞ն կարելի է ծաղրել մարդկանց»,- ասել է ընդդիմադիր պատգամավորը:

Ըստ Պետրոսյանի՝ իշխանությունը տնտեսությունն ու սոցիալական ապահովության ոլորտը հասցրել է կործանման և ժողովրդին խաբելով է առաջնորդում. «Հնարավոր է՝ Փաշինյանը մի պահ առողջ դատողությամբ հասկանա, որ չի կարողանում կառավարել երկիրը: Բացի արտահերթ ընտրություններից՝ այլ տարբերակ չկա, իրենցից մեկը հո նոր վարչապետ չի՞ լինելու: Ընդդիմության համարյա ցանկացած նախագիծ մերժում են, երբ մեր արժեհամակարգի, եկեղեցու, բանակի մասին օրինագիծ է լինում, գրոհում են»:

Քաղաքական գործչի կարծիքով՝ Գագիկ Ծառուկյանի նկատմամբ քրեական հետապնդումն սկսվեց, երբ նա խոսեց կառավարության հրաժարականի մասին. «Փաշինյանը գնում ու մասնակցում էր Ծառուկյանի գործարանի բացմանը, դե թող ասեր՝ դու հանցագործ ես, չեմ գա: Իշխանական խմբակցությունում քանի՞ քաղաքական դեմք կա: Նրանք բոլորը քայլելով եկան-դարձան պատգամավոր: Եթե, օրինակ, Անդրանիկ Քոչարյանը քաղաքական գործիչ է, ես էլ մնջախաղի թատրոնի դերասան եմ: Իշխանությունն առանց դիմակ դնելու զբաղված է իր հաճույքներով: Կաթողիկո՞սն է շատ շփվում հանրության հետ, թե՞ պատգամավորը, որ կաթողիկոսին թույլ են տալիս առանց դիմակի շրջել, պատգամավորներին՝ ոչ»:

Գևորգ Պետրոսյանի պնդմամբ՝ վարչապետն զբաղված է քաղաքացիներին գրպանելով, չի մտածում՝ թոշակառուն որտեղի՞ց օրական երեք դիմակ գնի. «Փաշինյանը հասկացել է, որ ամբողջ աշխարհը տեսնում է՝ Հայաստանում ներդրումային միջավայր չկա, նա իր հույսը դրել է տուգանքների վրա: Թոշակառուները վախենում են տանից դուրս գալ, որ չտուգանվեն: Ոստիկանությանը դարձրել են թշնամի, աղբ թափելիս մոտենում և անձնագիր են ուզում, եթե չունես՝ տուգանում են: Փաշինյանը թող առանց թիկնազորի շրջի մարզերում և լսի, թե ինչ են խոսում իր մասին»:

ԲՀԿ-ական պատգամավորի պնդմամբ՝ այսօր Փաշինյանի հույսը տուգանքներն ու «ֆեյքերի» բանակն են: «Վարչապետը թող չմոռանա, որ 2018-ի մայիսին ընտրվել է ԲՀԿ-ի շնորհիվ: Ծառուկյանի մի արտահայտության պատճառով ընկել են նրա հետևից: Իմքայլականները քրեական հեղինակությունների շնորհիվ են դարձել պատգամավոր, հիմա էլ մեծ-մեծ խոսում են: Նիկոլ Փաշինյանը կարգ է սահմանել, որ նախագահը, գլխավոր դատախազը, Վճռաբեկ և Սահմանադրական դատարանների նախագահն ինքն է, որևէ պաշտոնյա գոյություն չունի»,- ամփոփել է ընդդիմադիր պատգամավորը: