Ի՞նչ մասնակցություն եք ունեցել «Ա1+»-ի փակման գործընթացում. Անի Սամսոնյանը՝ Երվանդ Խունդկարյանին (տեսանյութ)

ԱԺ-ն քննարկում է ՍԴ դատավորի ընտրության հարցը, թեկնածուն Երվանդ Խունդկարյանն է: Թեկնածուին խորհրդարանում ներկայացրեց Վճռաբեկ դատարանի քրեական գործերով պալատի նախագահ Լիլիթ Թադևոսյանը, ապա պատգմավորներին իր տեսլականները ներկայացրեց Խունդկարյանը, ինչից հետո, պատգամավորները հարցեր ուղղեցին նրան:

«Լուսավոր Հայաստան» խմբակցության պատգամավոր Անի Սամսոնյանը նշեց, որ Խունդկարյանը 2010-2018 թթ. եղել է Վճռաբեկ դատարանի քաղաքացիական և վարչական պալատի նախագահը և մեջբերեց այդ ժամանակվա ՄԻՊ-ի զեկույցը, որտեղ նշվում է, որ դատարանները, այդ թվում նաև Վճռաբեկ դատարանը, կոռուպցիոն գործարքների մեջ է, դատավորները անկաշկանդ չեն և այլն, ապա հարցրեց Խունդկարյանից. «Ի՞նչ տեսակ կոռուպցիոն մեխանիզմներ են գործել Վճռաբեկ դատարանում և ինչպիսի՞ ճնշումների եք ենթարկվել Դուք»:

Երվանդ Խունդկարյանը շեշտեց, որ իր գործունեության ընթացքում որևիցե զոնալ դատավոր համակարգի գոյության մասին որևիցե ընթացակարգ կամ ներքին մեխանիզմներ երբևէ գոյություն չեն ունեցել:

«Ավելին, ես ինձ վրա որևէ ճնշում չեմ զգացել և նման ճնշումների առկայության դեպքում թե՛ ես, թե՛ ցանկացած դատավոր պարտավոր էր դատավորների անկախությունը երաշխավորող մարմինների առջև այդ հարցը բարձրացնել, իսկ ինչ վերաբերում է Մարդու իրավունքների պաշտպանի կողմից ներկայացված այդ արտահերթ ելույթին, որը 2009 թվականի դեկտեմբերին էր, ապա մենք՝ դատավորներս, սովոր ենք խոսել փաստերի և ապացույցների լեզվով և անապացույց անփաստարկ որևէ մեկնաբանությունների մենք չենք կարող որևէ կերպ արձագանքել»,- ասաց նա:

ՍԴ դատավորի թեկնածուն ընդգծեց, որ Պաշտպանի այդ ելույթին արձագանքել է Դատավորների միության խորհուրդը 2009 թվականի դեկտեմբերին, և այդ հայտարարությանն ավելացնելու որևէ այլ բան ինքը չունի:

«Ամբողջ հենքը կայանում էր նրանում, որ որոշակի բամբասանքների հիման վրա առկա որևէ տեղեկատվություն չի կարող բարձրաձայնվել, եթե կային համապատասխան կոռուպցիոն գործողություններ և եղել են որոշակի հանցավոր գործողություններ, ապա դրանով օժտված է ոչ թե վճռաբեկ դատարանի դատավորը կամ որևէ պալատի նախագահ, այլ համապատասխան լիազորություններ ունեցել է և ունեն համապատասխան քննչական մարմինները և իմ կարծիքով՝ նրանք այդ հետաքննությունը իրականացրած կլինեին»,- արձագանքեց նա:

Պատգամավոր Անի Սամսոնյանն էլ հակադարձեց՝ նշելով, որ փաստեր օմբուդսմենը ներկայացրել է իր զեկույցում և դրանք փաստեր են դատավորների գաղտնի զեկուցումներից: «Ձեր մասնակցությամբ կայացված բազմաթիվ որոշումներ ՄԻԵԴ-ում հասել են այն բանին, որ պետությանը բերել են նյութական մեծ կորուստներ, նաև խնդրում ենք ասեք, Դուք ի՞նչ մասնակցություն եք ունեցել «Ա1+» հեռուստաընկերության փակման գործում»,- հարցրեց պատգամավորը:

Երվանդ Խունդկարյանն էլ նշեց, որ «Ա1+»-ի գործով ինքը հանդես է եկել որպես միանձնյա դատավոր, երբ աշխատել է որպես տնտեսական դատարանի դատավոր: «Միանձնյա գործ քննելիս դատավորի թույլ տված խախտումերն են, որ որոշակի պատկերացում կարող են տալ այդ դատավորի մասնագիտական ունակությունների կամ վարքագծի վերաբերյալ, բայց ես զարմացած եմ տարբեր ԶԼՄ-ներով տարածված այն տեղեկատվության մասով, թե դատավոր Խունդկարյանը փակել է «Ա1+»-ը, և նրա թույլ տված սխալների հետևանքով է որ «Մետեքս» ՍՊԸ-ն արդյունքում պետությունից որոշակի փոխհատուցում է ստացել։ Եթե նման հայտարարություններ են արվում, ես տարակուսում եմ՝ արդյո՞ք մարդիկ կարդացել են ՄԻԵԴ-ի այդ վճիռը, որտեղ ՄԻԵԴ-ը արձանագրել է, որ արդար դատաքննության խախտում տեղի չի ունեցել Կոնվենցիայի 6-րդ հոդվածի խախտման տեսանկյունից, որ տնտեսական դատարանի վարքագիծը և գործողությունները եղել են օրինական, որովհետև տնտեսական դատարանն ինքը քննարկել է բոլոր կողմերի միջնորդությունները, ավելին՝ ապահովել է զենքերի հավասարության սկզբունքը դատավորության ընթացքում»,- ասաց նա: