«Մորս ստամոքսի խոցով տարել ենք հիվանդանոց, մահվան վկայականով տալիս են, որ կորոնավիրուսից ա մահացել». Հասմիկ Խաչատրյան

Վանաձորի բնակիչ Հասմիկ Խաչատրյանը, որն օրեր առաջ է կորցրել մորը՝ Գեղեցիկ Մարգարյանին, վստահեցնում է՝ սխալ է, որ մոր մահվան վկայականում որպես մահվան պատճառ է գրված կորոնավիրուսը: Հասմիկ Խաչատրյանի խոսքով՝ օգոստոսի 15-ին 12 տարի ինսուլին ստացող մորը շտապօգնության մեքենայով տեղափոխել են Վանաձորի ԲԿ, իսկ մահվանից հետո բժիշկները նրա մոտ ախտորոշել են կորոնավիրուս:

«Ներքին արյունահոսություն էր ունեցել, խոց էր տրաքել, իհարկե, շտապօգնության բժշկի ասածով եմ ես կրկնում, շտապօգնությունը կանչել եմ, մեքենայով տարել ենք Վանաձորի բժշկական կետրոն, տեղափոխել են վիրաբուժական բաժանմունք: Օրը եղել ա շաբաթ, առավոտյան ընդունել են, բարձրացրել են բաժանմունք, հետազոտություններ արել են՝ մենակ կարդիոգրամա, արյուն են վերցրել անալիզների համար, ու բժիշկ չլինելու պատճառով մնացել ենք, որ գաստրոսկոպիան լինի երկուշաբթի օրը: Շաբաթ-կիրակի չի ստացել ինսուլին, ոչ մի օր, ո՛չ հաց, ո՛չ ջուր, ո՛չ ինսուլին չի ստացել ինքը,- 168.am-ի հետ զրույցում ասաց տիկին Հասմիկը՝ շարունակելով: -Երկուշաբթի առավոտյան՝ բժիշկների շրջայցից հետո, մոտեցել եմ իրեն ընդունող բժշկին, ասել եմ՝ «ի՞նչ հետազոտություն ունենք», ասել ա՝ «ինքը մեր հիվանդը չի, պետք ա տեղափոխվի ուրիշ բաժանմունք»: Հետո նշանակել են ռենտգեն՝ թոքերի, ու մեկ էլ՝ էխոկարդիոգրաֆիա: Ստացել ենք ռենտգեն, ասել են՝ «երկկողմանի թոքաբորբ ա», բայց բարձրացրել են նորից բաժանմունք: Վիրաբուժական բաժանմունքում միացրել են կաթիլային, կաթիլայինից հետո անցել ա մոտ 20-30 րոպե, ընթացքում՝ շնչահեղձ, անբավարար սրտի աշխատանք, հետո քանի գնացել ա, վիճակը վատացել ա, տեղափոխել են թթվածնով հիվանդասենյակ, միացրել են սարքը, մնացել ա էդ վիճակում: Քանի գնացել ա՝ իրա վիճակը արդեն անկայուն ա եղել: Դիմել եմ բժիշկներին, ասել են՝ «բոլոր բուժօգնությունը ինքը ստանում ա»:

Մոտեցել եմ ուրիշ բժիշկների, որ ինչ հնարավոր ա՝ արվի, ասել են՝ «ինքը մեր վիրաբուժականի հիվանդ չի, պետք ա տեղափոխվի թերապիա»: Թերապիան չի ընդունել, ասել ա՝ «չեմ ընդունում»: Չգիտեմ՝ ինչ պատճառաբանությամբ թերապիան չի ընդունել, վիրաբուժականն ասել ա՝ «իմ հիվանդը չի, բայց ես իմ բուժօգնությունը լրիվ ցույց եմ տալիս իրան»:

Քանի գնացել ա, վիճակը վատացել ա, ու ինքը ընկել ա կոմայի մեջ: Կոմայի միջից մինչև օրվա վերջ մնացել ա, դուրս չի եկել, վերակենդանացում չեն տեղափոխել, նրանից հետո արդեն երեկոյան ժամերին ավելի ա վատացել: Բժիշկները եկել են շատ ուշ ժամերի, 9։30-ի սահմաններում, սրտաբան ա եկել, էնդոկրինոլոգ ա եկել, մինչ այդ ոչ մի բժիշկ չկար հիվանդանոցում, մոտեցել են, տեսել են՝ արդեն ճնշում չկա, ես ինքս էլ տեսա, որ ճնշում չունի ինքը, տեղափոխել են վերակենդանացում ու մահացել ա մամաս՝ բուկվալնի 5 րոպե հետո»,- պատմեց Հասմիկ Խաչատրյանը:

Տիկնոջ խոսքով՝ օգոստոսի 17-ի երեկոյան, մոր մահվանից հետո, հիվանդանոցում նախ ասել են, թե դիակը կտանեն դիահերձարան, ապա ասել, թե պետք է կորոնավիրուսի թեստավորում անեն:

«Հետո ասեցին՝ «2 ժամից կտեղափոխենք մորգ», մորգից ասեցին, որ պետք ա թեստավորվի կորոնավիրուսի համար: Հետո իրանք սկզբից ասեցին՝ «թեստը բացասական ա, համապատասխան իրերը բերեք», իրերը տարել ենք, հետո, 1 ժամ հետո ասել են՝ «չէ, դրական ա թեստը, չի տրվելու դիակը»: Մեզ տվել են դիակը փակ, պլոմբած ու հաստատել են, որ կորոնավիրուսից ա մահացել:

Չի համոզում ինձ: Ես վստահ եմ, որ չի մահացել կորոնավիրուսից, ուղղակի չգիտեմ՝ ինչ հիմքերով, մահանալուց հետո ինչ հիմք կարան դնեն ու թեստավորեն»,- ասաց Հասմիկ Խաչատրյանը:

Մեր զրուցակիցը, ով մոր հիվանդանոցում գտնվելու 3 օրվա ընթացքում խնամել է նրան, վստահեցրեց, թե մայրը կորոնավիրուսի ախտանիշներ՝ հազ, ջերմություն, չի ունեցել: Զարմացած պատմում էր, որ, եթե հիվանդանոցում կասկածներ են նկատել, ինչո՞ւ հենց հիվանդանոցում չեն մեկուսացրել նրան: Ասում է՝ եթե կասկած կար, գոնե թող թոքերը նկարելուց հետո թույլ չտային, որ պալատ գնային:

«3-րդ օրը՝ երկուշաբթի առավոտյան ա մենակ ջերմություն ունեցել: Ինքս էլ չեմ ունեցել ջերմություն: Նրանից հետո ասել են՝ «մենք իրան անտիբիոտիկներ կներարկենք»: Չգիտեմ՝ ոնց, բայց վերջում մահվան վկայականով տալիս են, որ կորոնավիրուսից ա մահացել:

Չեմ կարա ասեմ՝ ինչ պատճառով կարան հիմք հանդիսացնեն, կորոնավիրուսի հետ կապեն մորս մահը: Ինձ պարզաբանումներն են պետք ու հիմքեր: Թեստը ցույց տան, ինչ-որ մեկս տեսնեինք, որ թեստը դրական ա: Ոչ ոք թեստը չի տեսել, ուղղակի իրենք ասել են՝ կորոնավիրուս ա»,- ասաց Հասմիկ Խաչատրյանը՝ նշելով, որ իրենց անգամ չեն ասել, թե ինչու են որոշել մահվանից հետո կորոնավիրուսի թեստավորում անել:

Մեր զրուցակցի համար այս ողջ պատմության մեջ մյուս զարմանալի փաստը մոր մահվանից մեկ շաբաթ առաջ պարետատնից ստացած զանգն է:

«Պարետատնից զանգել են ամսի 24-ին, ինձ մոտ ֆիքսված կա իմ հեռախոսի մեջ, ասել են՝ «Մարգարյան Գեղեցիկի հետ ենք խոսում», ես ասել եմ, որ՝ ոչ, բա «Մարգարյան Գեղեցիկը մեկուսացա՞ծ ա», ես իրանց ասել եմ՝ «Դուք տեղյակ չե՞ք, որ ինքը մահացել ա», իրանք ներողություն են խնդրել, ցավակցել են ու անջատել են»,- պատմեց Հասմիկ Խաչատրյանը՝ նշելով, որ հետո, երբ փորձել է հասկանալ, թե ինչպես է նման բան տեղի ունեցել, պարետատնից զանգերին չեն պատասխանել:

«Միայն ուզում եմ, որ իրենց սահմանների չափով պատժվեն, իրենց սխալ գործերի հետևանքով: Թող ես լինեմ վերջինը, թող ոչ մի ծնողի կորուստ չտեսնի ոչ մի զավակ»,- հավելեց Հասմիկ Խաչատրյանը:

Հարցին, թե ի՞նչ հանգամանքների դեպքում է որոշվում մարդու մահվանից հետո կորոնավիրուսի թեստավորում իրականացնել, ՀՀ առողջապահության նախարարի մամուլի խոսնակ Ալինա Նիկողոսյանը պատասխանեց.

«Վարակիչ հիվանդությունների կասկածի դեպքում, այդ թվում՝ Քովիդի, եթե կենդանության օրոք չի կատարվել նմուշառում, ապա մինչև դիահերձումը կամ դիահերձման ընթացքում (կախված հիվանդության տեսակից) կատարվում է նմուշառում և թեստավորում»:

Մանրամասները՝ տեսանյութում