Ողջ դասի ընթացքում դիմակ դնելը երեխաների մոտ ավելորդ հոգնածություն կառաջացնի, նաև գլխացավեր. բժիշկ (տեսանյութ)

Սեպտեմբերի 14–ից դպրոցները կբացեն իրենց դռները, սակայն աշակերտներն ու ուսուցիչները պարտավոր կլինեն պահպանել մի շարք կանոններ, այդ թվում՝ դիմակ դնելը, դասամիջոցներին դասարանից դուրս չգալը, գրատախտակի մոտ չգնալը, դպրոցներում չեն գործի երկարօրյա պարապմունքներն ու խմբակները։

ԿԳՄՍՆ-ն կորոնավիրուսային հիվանդության պայմաններում հանրակրթական ուսումնական հաստատություններում գործունեության կազմակերպման ուղեցույց է հրապարակել, որը մտահոգել է ծնողներին:

Սիրան Սուքիասյանը, ով երկու երեխայի մայր է, գոհ չէ ներկայացվող պահանջներից: Նա կարծում է, որ ավելի նպատակահարմար կլիներ խստորեն հետևել հիգիենայի կանոններին, այսպես թե այնպես երեխաները մշտապես շփվում են իրենց ընկերների հետ: Բացի այդ, ըստ նրա՝ դիմակներ դնելուց շատերի մոտ ի հայտ կգան այլ խնդիրներ:

Բժշկական գիտությունների դոկտոր, պրոֆեսոր Գարիկ Աղաբեկյանի կարծիքով՝ դիմակ դնելը դժվար է նույնիսկ չափահաս մարդկանց համար, ուր մնաց երեխաների համար։

Նա համարում է, որ դիմակ դնելը ողջ դասընթացի ժամանակ երեխաների մոտ կառաջացնի ավելորդ հոգնածություն, ինչպես նաև գլխացավեր: Եվ հետո երեխաները, միևնույն է, զերծ չեն մնալու մեկը մյուսի հետ շփումից, ուստի, նրա կարծիքով, չկա դիմակ դնելու անհրաժեշտություն:

Գարիկ Աղաբեկյանի կարծիքով` երեխաները պետք է հաճախեն դպրոց, սակայն առանց դիմակների, քանի որ դիմակները կարող են հակառակ ազդեցությունն ունենալ երեխաների առողջության վրա։