Էրդողանը մեղադրել է Amnesty International-ին

Թուրքիայի նախագահ Ռեջեփ Թայիփ Էրդողանը պատասխանել է Amnesty International միջազգային իրավապաշտպան կազմակերպության հնչեցրած քննադատություններին ու հայտարարել, որ ժամանակին, երբ ինքը բանտում էր, նույն կազմակերպությունն իրեն որևէ զգալի օգուտ չտվեց։

Հիշեցնենք, որ օրեր առաջ Ստամբուլի կղզիներում ձեռնարկված հատուկ գործողության ընթացքում խմբակային կերպով ձերբակալվել են Թուրքիայում մարդու իրավունքների պաշտպանությամբ զբաղվող առաջադեմ կազմակերպությունների մի շարք անդամներ: Նրանց թվում է նաև Amnesty International-ի Թուրքիայի գրասենյակի տնօրեն Իդիլ Էսերը: Զանգվածային ձերբակալությունը տեղի է ունեցել անսպասելի՝ մարդու իրավունքների պաշտպանությամբ զբաղվողների կողմից Ստամբուլի կղզիներից մեկի հյուրանոցում հրավիրված հատուկ ժողովի ընթացքում:

Amnesty International-ը, կոչ անելով ազատ արձակել իրավապաշտպաններին, հիշեցրել է Էրդողանին, որ 1998թ.-ին իրենք նույն կոչով հանդես են եկել, երբ անազատության էր դատապարտվել հենց նա։

«Այն ժամանակ, երբ գնացինք նրանց մոտ, մեզ անգամ նորմալ չընդունեցին։ Կոչեր արեցիք, ու ի՞նչ փոխվեց, ինչո՞վ օգնեցիք, դատապարտվեցի, ազատազրկվեցի», - ասել է Էրդողանը։

Նշենք, որ 1997թ.-ի փետրվարի 28-ի «թավշյա հեղաշրջման» ժամանակ հետապնդվել է նաև Թուրքիայի ներկայիս նախագահ Ռեջեփ Թայիփ Էրդողանը: