Հիմա 18,5 ստացած իմ աղջիկը նստի տանը, իսկ 7,5 ստացողը գնա սովորի՞. դա՞ է երկրի ապագան.բողոքի ակցիա ԱԺ-ի մոտ (տեսանյութ)

Բուհեր չընդունված դիմորդների ծնողները և հենց դիմորդները այսօր՝ հուլիսի 22-ին, կրկին հավաքվել էին Ազգային ժողովի մոտ ու ակցիա էին իրականացնում՝ պահանջելով լուծում տալ իրենց հարցին՝ նշելով, թե անարդարացի է, որ իրենք ստացել են բարձր բալեր, չեն ընդունվել որևէ տեղ, սակայն օրինակ 7,5 բալ ստացողն ընդունվել է:

Լրագրողների հետ զրույցում ակցիայի մասնակից ծնողներից մեկը նշեց, որ իր աղջիկը 12 տարի գերազանցիկ սովորել է, դպրոցում իր նկարը միշտ կպցրած է եղել, մասնակցել է օլիմպիադաների, իսկ քննությանը ստացել է 18,5 բալ, սակայն որևէ տեղ չի անցել. «Նա նշել է երկու բաժին: Առաջինով իրավագիտությունից դուրս է մնացել, երկրորդով միջազգային չի անցել 18,5-ով, մինչդեռ այդտեղ մարդիկ 11 բալով անցել են»:

Քաղաքացու խոսքով, քննություններից առաջ զանգահարել է ԳԹԿ պայմաններին ծանոթանալու համար, այնտեղից ասել են, որ քննություններից հետո կներկայացնեն, թե ոնց են հաշվում. «Այնպես են բացատրել, որ մարդիկ չեն հասկացել, թե ինչպես է կարգը լինելու: Հիմա մեր երեխաները պետք է նստեն տանն, իսկ 7,5 ստացողը գնա սովորի՞: Դա՞ է մեր երկրի ապագան լինելու»:

Ինչ վերաբերում է իրենց սպասելիքներին, նա նշել է, որ չգիտեն, թե ինչ կլինի. «Եթե սենց նախարար ունենանք, դժվար լավ բան սպասենք, բայց մենք այս հեղափոխությունը չենք արել, որ մեր երեխաները մնան դուրսը: Նախարարն ասում է, թող իմ երեխան գնա թուրքագիտություն սովորի: Ես էլ ասել եմ, թող ինքը գնա սովորի, իմ երեխան կոնկրետ տեղ է ուզում սովորել: Թող երեք քննություն նշանակեին, իմ երեխան ու մյուսները հանձնեին այդ քննությունը: Ասացին՝ երեք քննությունն անցկացնելը վտանգավոր էր, ես էլ ասացի՝ եթե այսպես շարունակվի, դուք ավելի վտանգավոր եք իմ երեխայի համար, քան կորոնավիրուսը»,-ասաց ծնողը:

Նա հավելեց, որ ճիշտ կլինի, որ ԱԺ կրթության հանձնաժողովում այս հարցով քննարկմանը թույլ տան մի քանի ծնող մասնակցի:

Ծնողներն առաջարկում են խնդիրը լուծելու համար տեղեր ավելացնեն, այսինքն ոչ թե 7,5 բալ ստացածին հանեն, այլ տեղեր ավելացնեն բարձր բալեր ստացած դիմորդների համար, հետո առաջին սեմեստրից հետո խիստ քննություն կազմակերպեն եւ ցածր ստացողներին դուրս թողնեն:

Հիշեցնենք, որ երեկ նրանք ակցիա արեցին նախ ԳԹԿ-ի դիմաց, ապա դարձյալ ԱԺ-ի։ Նրանք նաեւ նամակ հանձնեցին ԱԺ մարդու իրավունքների պաշտպանության մշտական հանձնաժողովի նախագահին։