Մխիթար Հայրապետյանը լրատվամիջոցին կես ժամ ժամանակ տվեց (տեսանյութ)

Այսօր՝ հունիսի 18-ին, Ազգային ժողովը շարունակում է հերթական նիստի աշխատանքը: Այժմ է քննարկվում է Տեսալսողական մեդիայի մասին օրենքի նախագիծը:

«Իմ քայլը» խմբակցության պատգամավոր Մխիթար Հայրապետյանը խոսեց քաղաքական գործչի խոսքի կշռի և նախընտրական խոստումների մասին. «Ես հայտարարել եմ, որ մինչև 2021 թվականը նախաձեռնելու եմ 3 մայր օրենքներ: Մենք հետևողական ենք մեր տված խոստումները իրականացնելու գործում»:

Նրա խոսքով` իրենց նախընտրական խոստումն անգամ ավելի համեստ է եղել: Անդրադառնալով գործընկերների քննադատությանը` Հայրապետյանը հեգնեց. «Այո, այն չի լուծում նաև ՍԴ ճգնաժամը, և շատ թերի նախագիծ ենք բերել»:

Պատգամավորն ընդգծեց. «Քավ լիցի, մենք չենք գալիս որևէ հեռուստաալիք կամ սերիալ փակելու: Օրենքի արդյունքում հեռուստաեթերի աղբը լինելու է ոչ մրցունակ: Սույն օրենքը չի կարող հասարակության համար լինել տեսանելի բովանդակության առումով: Մեկ տարի անց մեր հեռուստադիտողը տեսնելու է շոշափելի տարբերություն: Այսօր դնելու ենք փայլուն հիմքեր»:

Մխիթար Հայրապետյանը նշեց, որ իրեն ուղարկել են մի լրատվականի նյութ, որը վերնագրված էր` «ԱԺ-ում այս պահին քննարկվում է ռուսական հեռուստաալիքների դեմ նախագիծ». «Ես այդ լրատվականի անունը դեռևս չեմ տալիս: Կես ժամ ժամանակ եմ տալիս էդ լրատվամիջոցի շեխերին, դրանց հետևում կանգնած անձանց. էս դավաճանական, հակապետական վերնագիրը կամ նյութը հեռացնում եք»: