«Որ երկրներն են ամենամեծ սպառնալիքը հանդիսանում Թուրքիայի համար». Հայաստանն այդ երկրին սպառնացող վտանգներից մեկն է

Թուրքիայի «Kadir Has» համալսարանի աշխատանքային խումբը երկրի 26 նահանգի 1000 չափահաս քաղաքացիների շրջանում «Թուրքիայի արտաքին քաղաքականության ժողովրդական ընկալումների ուսումնասիրություն» վերնագրով սոցհարցում է անցկացրել, որի ընթացքում հարցվածները Թուրքիային սպառնացող վտանգների թվում ներառել են նաև Հայաստանը: Այս մասին գրում է yeniçağ gazetesi պարբերականը:

Ըստ հարցման արդյունքների` բնակչության 86%-ն արտաքին քաղաքական լուրերին հետևում է հեռուստատեսությամբ, 50%-ը` սոցիալական ցանցերի միջոցով, իսկ 43%-ը` համացանցային լրատվական պորտալների միջոցով:

Հարցին, թե որոնք կլինեն առաջիկա 10 տարիներին Թուրքիայի 3 գլխավոր արտաքին քաղաքական խնդիրները` հարցվածների 46,6%-ը նշել է արտաքին ահաբեկչության վտանգը, 46%-ը` Սիրիայի հակամարտությունը, 40%-ը` համաշխարհային տնտեսական ճգնաժամը, իսկ 30%-ը` մերձարևելյան հակամարտությունները:

Թուրքիայի նկատմամբ սպառնալիք հանդիսացող երկրների մասով բնակչության մեծամասնությունը՝ 70%-ը կարծում է, որ Թուրքիայի համար ամենամեծ վտանգը ներկայացնում է ԱՄՆ-ն, այնուհետև Իսրայելը` 67%, և Սիրիան` 65%: Այս ցուցակում նշված երկրներին հաջորդում են համապատասխանաբար Իրանը, Հունաստանը և Հայաստանը: