Թրամփը հետևել է Crew Dragon տիեզերանավի պատմական արձակմանը (տեսանյութ)

ԱՄՆ նախագահ Դոնալդ Թրամփը ժամանել է Ֆլորիդայի Կանավերալ հրվանդան՝ հետևելու SpaceX ընկերության հրթիռի արձակմանը: Այս մասին հաղորդում է РИА Новости-ն:

Falcon 9 հրթիռը պետք է ուղեծիր հասցնի Crew Dragon տիեզերանավը ՆԱՍԱ-ի տիեզերագնացներ Բոբ Բենքենի և Դագ Հերլիի հետ միասին: Կիրակի նախատեսված է տիեզերանավի միակցումը Միջազգային տիեզերակայանին:

ՆԱՍԱ-ի ղեկավար Ջիմ Բրայդենցտայնը հայտնել է, որ եղանակը բարենպաստ է հրթիռի արձակման համար: Ավելի վաղ նա միջոցառման չեղարկումը 50 տոկոս էր գնահատում եղանակային պայմանների պատճառով:

Նախապես Crew Dragon-ի պատմական արձակումը նախատեսված էր մայիսի 28-ին, սակայն չեղարկվել էր եղանակային պայմանների պատճառով: 2011 թվականից ի վեր առաջին անգամ ՆԱՍԱ-ի տիեզերագնացները Միջազգային տիեզերակայան պետք է թռչեն ամերիկյան տիեզերանավով և ոչ թե ռուսական «Սոյուզ»-ով: