Վրաստանը պատրաստ է անհրաժեշտության դեպքում օգնել Հայաստանին․ Ամիրան Գամկրելիձե

Եթե Հայաստանի հիվանդությունների վերահսկման ազգային կենտրոնը հարց է բարձրացնում, որ իրենց օգնություն է անհրաժեշտ, ապա մենք պատրաստ ենք ամեն ինչ անել՝ մեր իրավասության շրջանակներում, կապված թեսթավորման կամ այլ հարցերի հետ: Այս մասին հայտարարել է Վրաստանի հիվանդությունների վերահսկման եւ հանրային առողջության ազգային կենտրոնի ղեկավար Ամիրան Գամկրելիձեն, հայտնում է «Գրուզիա-օնլայն»-ը։

Ինչպես գիտեք, մի շաբաթ առաջ տեղի ունեցավ մի փոքր թյուրիմացություն: Մենք եղբայրական ժողովուրդներ ենք, միշտ սատարում ենք միմյանց, եւ մենք լավ հարաբերություններ ունենք Հայաստանի հիվանդությունների վերահսկման ազգային կենտրոնի հետ: Եթե Հայաստանի կենտրոնը հարց բարձրացնի, որ իրենց օգնություն է պետք, ապա մենք պատրաստ ենք անել ամեն բան, ինչը մեր իրավասության շրջանակներում է՝ կապված թեսթավորման կամ այլ հարցերի հետ»,- ասել է Գամկրելիձեն:

Պատասխանելով այն հարցին, թե պատրաստ է արդյոք Վրաստանն ընդունել Հայաստանից կորոնավիրուսով հիվանդների, նա նշել է. «Եթե Հայաստանին այսօր այդ օգնությունը պետք է, ես վստահ եմ, որ Վրաստանի կառավարությունն ու առողջապահության նախարարությունը չեն մերժի եւ կնախաձեռնեն բոլոր միջոցները: Առաջին հերթին, Հայաստանի առողջապահության նախարարությունը պետք է բարձրացնի այդ հարցը, եւ այդ դեպքում, ես վստահ եմ, որ Վրաստանը դա կլուծի: Ինչպես գիտեք, վրացիներն առաջինն էին, որ եկել էին Սպիտակ՝ երկրաշարժի ժամանակ: Մենք միշտ պատրաստ ենք»:

Նրա խոսքերով՝ Վրաստանը եւ Հայաստանը առողջապահության պահպանման ոլորտում համագործակցության լավ փորձ ունեն: