Ակցիայի մասնակիցներին բերման ենթարկելը Փաշինյանի վախերի ուղիղ դրսևորումն է, ազատ խոսքը ճնշելու ջանքեր. Էդուարդ Շարմազանով (տեսանյութ)

Հայաստանի Հանրապետական կուսակցության երիտասարդական կազմակեչպության մի քանի անդամներ ևս բերման են ենթարկվել: Այս մասին այսօր լրագրողների հետ զրույցում ասաց ՀՀԿ խոսնակ Էդուրադ Շարմազանովը՝ խոսելով այսօր Քրեական ոստիկանության մոտից քաղաքացիներին բերման ենթարկելու մասին:

«Այս ակցիան Նիկոլ Փաշինյանի կողմից ոչ այլ ինչ է, քան նրա վախերի ուղիղ դրսևորում և ազատ խոսքը, բազմակարծությունը ճնշելու համար ջանքեր, սակայն չի հաջողվելու դա: Փաշինյանը տանուլ է տվել ամեն ինչ և օր օրի կորցնում և մսխում է մեր պետական ինքնիշխանությունը, մեր պետական շահը»,- ասաց նա:

Ըստ նրա՝ այն, ինչ տեղի է ունենում այսօր վարչապետի կողմից, անթույլատրելի է, նա նաև նշեց, որ այն գործողությունները, որոնք ծավալվում են կորոնավիրուսի տարածմումը կանխարգելելու համար, իրականում այլ ենթատեքստեր ունեն:

«Մարդկանց կարելի է երթուղային նստել, հավաքվել, բայց ակցիա անել չի կարելի: Եթե արտակարգ դրությունը երկարեցրել է, ապա սահմանափակումներն էլ պետք է պահպաներ: Նա փորձում է տեղ-տեղ ճնշել, բայց դա նրանց չի հաջողվելու: Մեզ էլ բռնեն, ուրիշներն են գալու: Փաշինյանին հաշված ժամանակաշրջան է մնացել»,- շեշտեց նախկին պատգամավորը:

Հիշեցնենք, որ Ոստիկանության մոտ այսօր հավաքված «Ադեկվադ» միաբանության անդամները բերման ենթարկվեցին: Ոստիկանները նշեցին, որ բերման ենթարկելու պատճառը պարետի որոշումը խախտելն է: Ոստիկանության լրատվության վարչությունից Tert.am-ի հայտնեցին, որ ոստիկանություն բերման է ենթարկվել 17 անձ։

Միաբանության անդամները Ոստիկանության մոտ էին՝ աջակցելու Միաբանության ղեկավար Արթուր Դանիելյանին, որին հրավիրել էին Ոստիկանություն։