Իրանում կորոնավիրուսի հայտնաբերման թեստ են ստեղծել, որն արդյունքը ցույց է տալիս 30 վայրկյանում

Իրանցի գիտնականները թեստ-համակարգ են ստեղծել, որն օգնում է կորոնավիրուսի առկայությունը հայտնաբերել 30 վայրկյանում: Այս մասին հայտնում է «Մեհր» գործակալությունը:

Նշվում է, որ համակարգը ստեղծվել է նանոնյութերի օգտագործմամբ: Գործակալության տվյալներով՝ թեստը կարող է կորոնավիրուսի առկայությունը բացահայտել մինչև 95 տոկոս ճշտությամբ, այդ թվում և հիվանդության սկզբնական փուլում: Թեստ-համակարգը դեռևս հաստատում չի ստացել:

Մինչև մայիսի 2-ը Իրանում նկատվել է կորոնավիրուսով վարակման նոր դեպքերի նվազման միտում: Պաշտոնական վիճակագրության համաձայն՝ մեկ օրում վարկաման դեպքերի առավելագույն ցուցանիշը (3186) գրանցվել է մարտի 30-ին, որից հետո սկսել է վարակման տեմպերի նվազումը՝ հասնելով նվազագույն 802-ի:

Մայիսի 3-ից այդ ցուցանիշը կրկին սկսել է բարձրանալ՝ տատանվելով 1300-1700-ի սահմանում: Ընդհանուր առմամբ, երկրում մինչ օրս վարակվել է 110 767 մարդ, մահացել է 6733-ը: