Իմ անձնական պարտավորությունն է կտրել «ատկատով» զբաղվողների ձեռքերը. Փաշինյան

Մենք չենք կարող ասել՝ կառավարությունը պետք է իր ստանդարտներն այնքան իջեցնի, մինչեւ հասնի այն մակարդակի, որտեղ աշխատանքի որակը երաշխավորված չէ: Այս մասին, այսօր՝ մայիսի 6-ին, ԱԺ-ում 2019-ի բյուջեի կատարողականի քննարկման ժամանակ հայտարարեց ՀՀ վարչապետ Նիկոլ Փաշինյանը:

«Մենք պետք է խթանենք ընկերություններին, որ նրանք իրենց աշխատանքի որակը բարձրացնեն: Ընդհանուր առմամբ խոսքը պետական գնումների ժամանակ բանկային երաշխիքների մասին է, ու իրականությանը չի համապատասխանում պնդումը, թե մենք դրանով փոքր ու միջին բիզնեսին դնում ենք ծանր վիճակի մեջ:

Պետական գնումների 80-85 տոկոսը դրանք մինչեւ 10 մլն դրամանոց գնումներն են, որոնց համար բանկային երաշխիք չի պահանջվում: Իսկ ինչ վերաբերում է բազմամիլիոնանոց գործերին, եթե նման գործի հավակնություն ունեցող ընկերությունը չի կարողանում բանկային երաշխիք բերի, ուրեմն մենք պետք է կասկածենք իր կարողությունների վրա: Մենք այսօր ճանապարհներ ունենք, որ պետք է քանդենք, նորից սարքենք, որովհետեւ անորակ են սարքել: Էդ դեպքում ընկերությունները պետք է իմանան, որ ֆինանսապես տուժելու են: Ես խնդրում եմ՝ դա որակի հաշվին չանենք»,-ասաց Փաշինյանը:

Նա նկատեց, որ այսօր ՀՀ-ում կան ճանապարհներ, որ կառուցվել են 2017-2018 թվականներին, բայց հիմա լրիվ պետք է քանդվի, նորից սարքվի. «Հիմա ընկած այդ ընկերությունների նկատմամբ տարբեր լծակներ ենք գործադրում, որ կարողանանք պարտադրել, որ իրենց վատ աշխատանքի հետեւանքները վերացնենք: Թող այդ բանկային երաշխիքը լինի, որ իրենց հետեւից ընկնելու անհրաժեշտություն չենք ունենա: Նախ անորակ աշխատանք անողը կսնանկանա, դաշտից դուրս կգա, իսկ նրանք, որոնք որակով, բայց փոքր ընկերություններ են, թող միանան իրար հետ համագործակցություն ձեւավորեն:

Մենք արդեն 2019-ին ունեցել ենք իրավիճակ, երբ մարդը շինարարություն ունի, բայց չի կարողացել շինարարական կազմակերպություն գտնել, քանի որ բոլորը գործ են ունեցել: Բանկային երաշխիքը ապահովագրում է մեզ, իսկ փոքր ու միջին բիզնեսին չի վնասում: Փոքր ընկերությունը պետք է անի փոքր շինարարություն: Փոքր ընկերությունը չի կարող անել մեծ շինարարություն, իսկ փոքր շինարարության համար բանկային երաշխիք չի պահանջվում»,-ընդգծեց վարչապետը:

Ինչ վերաբերում է գետական գնումների ոլորտում ատկատներին, Փաշինյանն ասաց. «Ես ասել եմ, որ իմ անձնական պարտավորությունն է կտրել բոլոր այն ձեռքերը, որոնք կփորձեն այդպիսի գործունեություն ծավալել: Ցավոք, ես այսօր չեմ կարող երաշխավորել, որ այդպիսի երեւույթներ ու ցանկություններ չկան,բայցես կարող եմ երաշխավորել, որ մեր քաղաքական կամքը՝ արմատախիլ անել այդ երեւույթը, անսասան է»: