Վանաձորում «Գլորիա» արտադրամասի աշխատակիցները ֆաբրիկա են ներխուժել, ուզում են աշխատել․ ոստիկանները մի քանիսին բերման են ենթարկել. սեփականատեր (տեսանյութ)

Վանաձորի «Գլորիա» կարի ֆաբրիկայի աշխատակիցները գործարան են գնացել, պահանջում են աշխատել: Tert.am-ը զրուցեց Վանաձորի քաղաքապետ Մամիկոն Ասլանյանի հետ, ով նշեց, որ ըստ իր տեղեկությունների՝ աշխատակիցների մի մասին ղեկավարը հրավիրել է գործարան՝ քննարկելու աշխատակիցների պահանջը:

«Մարդիկ աշխատել են ուզում, հետո կտեսնենք, թե սեփականատիրոջ առաջ ինչ պահանջներ են դրվում, եթե կկարողանան, ապա կաշխատեն»,-ասաց Մամիկոն Ասլանյանը:

Tert.am-ը զրուցեց նաև ֆաբրիկայի սեփականատեր Բագրատ Դարբինյանի հետ, ով նշեց, որ աշխատակիցներին դեռ վաղուց են տեղյակ պահել, որ հիմա աշխատել չեն կարող և հարցերի դեպքում պարետին դիմեն:

«Բայց չեն լսում, ներխուժում են արտադրամաս, ասում են՝ աշխատել ենք ուզում: Մարդիկ չեն կարողանում սոցիալական հարցերի եկամուտներն ապահովել: Զոռով եկել-մտել են, ու ոստիկանությունից ինձ են մեղադրում, թե ինչու եմ ներս թողել: Ասում եմ՝ ես հո չեմ ստիպելու, մտել են, եկեք դուք ձեր լիազորությունների շրջանակում դուրս հանեք»,-ասաց սեփականատերը:

Դաբինյանը նշեց, որ աշխատակիցների՝ աշխատանքի գալու պատճառով իրեն են մեղադրում, բայց ըստ նրա՝ առաջինը ոստիկանությունը պետք է այդ հարցը կարգավորեր. «Ես թշնամի չեմ դառնալու»:

Հարցին, թե ի՞նչ հայտարարի եկան թե՛ աշխատակիցների, թե՛ ոստիկանների հետ, սեփականատերը պատասխանեց, որ չգիտի: «Մի քանի հոգու բերման են ենթարկել, խառը իրավիճակ էր, չեմ ֆիքսել, թե քանիսին տարան»:

Հիշեցնենք, որ արտակարգ իրավիճակից ելնելով՝ Վանաձորի «Գլորիա» կարի ֆաբրիկայի ղեկավարությունը որոշել էր ֆաբրիկան որոշ ժամանակ չաշխատեցնել: Սեփականատերն ավելի ուշ հայտնել էր, որ որոշել են մեկ ամսով երկարացեն ֆաբրիկայի չաշխատելու գործընթացը, որը աշխատակիցների մոտ բողոքի ալիք է բարձրացրել:

Մանրամասները՝ տեսանյութում: