Քննադատողները Սահմանադրությունը լավ չեն կարդում. Արմեն Սարգսյան

Քննադատողները Սահմանադրությունը լավ չեն կարդում, որովհետեւ Սահմանադրության մեջ հստակ գրված է, որը ես ստորագրում եմ ընդամենը Սահմանադրության օրը նշանակելու համար։ Այս մասին այսօր՝ մարտի 5-ին, սպարապետ Վազգեն Սարգսյանի 61-ամյակի առիթով «Եռաբլուր» զինվորական պանթեոնում NEWS.am-ի հետ զրույցում ասաց ՀՀ նախագահ Արմեն Սարգսյանը՝ անդրադառնալով իր հասցեին հնչող քննադատություններին, որ ստորագրել է սահմանադրական հանրաքվե նշանակելու հրամանագիրը:

ՀՀ նախագահը նշեց, որ հանրաքվեի անցկացմանը եւ իրեն այդ հրամանագիրը ստորագրելու համար քննադատողները նախեւառաջ պետք է խորապես կարդան ՀՀ Սահմանադրությունը. «Քննադատողները Սահմանադրությունը լավ չեն կարդում, որովհետեւ Սահմանադրության մեջ հստակ գրված է, որը ես ստորագրում եմ ընդամենը Սահմանադրության օրը նշանակելու համար։ Եվ եթե ես չստորագրեմ, միեւնույն է 3 օրից նշանակվելու է։ Երբ քննադատողները Սահմանադրությունը խորապես կարդան, ընկալեն, մտածեն օրվա իրավիճակի մասին, երկրի զարգացման մասին, դրանից հետո ես պատրաստ եմ քննարկել եւ իրենց հետ հանդիպել»։

Արմեն Սարգսյանը հավելեց, որ ինքը հրավիրել է քննադատողների մի մեծ խմբի նախագահական, սակայն ոչ ոք չի եկել։

Նշենք, որ ՀՀ նախագահը ստորագրել է հրամանագիր, ըստ որի սահմանադրական փոփոխությունների հանրաքվեն տեղի կունենա ապրիլի 5-ին: Այս փոփոխություններով նախատեսվում է, որ 2018-ի ապրիլից առաջ ընտրված ՍԴ անդամների լիազորությունները դադարում են: ՍԴ 9 հոգանոց կազմից 7-ը ընտրվել են մինչեւ 2018-ի ապրիլը: